– Ардчилсан хувьсгалын түүхийг харуулсан үзэсгэлэн Занабазарын музейд 10 хоног үргэлжилнэ –
“Түүчээ цаг…” үзэсгэлэнд зураач Л.Хадбаатар, Г.Нороврагчаа нарын 60 бүтээл тавигджээ. Ардчилсан хувьсгалын 25 жилийн ой өнөөдрөөр эхэллээ. Энэ ойн арга хэмжээнд зориулж 1989-1990 онд тус хувьсгалыг эхлүүлж байсан зураач Л.Хадбаатар, Г.Нороврагчаа нар нийлж “Түүчээ цаг…” зургийн үзэсгэлэнг нээсэн юм.
Тус үзэсгэлэнгийн нээлтэд Ардчилсан намын дарга, УИХ-ын дарга З.Энхболд болон Их хурлын гишүүд, АН-ын үе үеийн гишүүд, дэмжигчид оролцлоо. Ардчилсан хувьсгалынхан 25 жилийн ойгоо бүтэн жил тэмдэглэх бөгөөд энэ сарын 10-ны өдөр “Ардчилал хүний эрхийн өдөр” нэртэйгээр тэмдэглэх Засгийн газрын хуралдааны шийдвэр гарчээ.
Өнөөдөр нээлтээ хийсэн “Түүчээ цаг…” үзэсгэлэнд Ардчилсан хувьсгалд гол үүрэг гүйцэтгэсэн хүмүүсийн хөрөг зураг болон ардчиллын сэдэвтэй уран зургийн 60 орчим бүтээл дэлгэгдсэн байна. Энэхүү үйл ажиллагааг АН-ын дарга З.Энхболд нээж үг хэлжээ. Ардчиллын ахмад партизанууд хийгээд гишүүд, дэмжигчид энэ үзэсгэлэнгийн уран бүтээлүүдээс өнгөрсөн 25 жилийн түүхээ эргэн харах боломж нээгджээ. Монголын ардчиллын үнэ цэнэ бүхий 25 жилийн товч түүхийг харуулсан “Түүчээ цаг…” үзэсгэлэн Занабазарын музейд 10 хоног үргэлжлэх юм байна.
www.URLAG.mn