Монгол Улсын Ерөнхийлөгчийн санаачилгаар зохиож буй "Мөнх тэнгэрийн бичиг" монгол бичгийн уран бичлэгийн үзэсгэлэн өнөөдрөөс эхлэн Хэнтий аймагт нээгдлээ. Тус үзэсгэлэн хоёр өдрийн хугацаатайгаар үргэлжлэх бөгөөд энэ үеэр монгол бичгийн уран бичлэгийн сургалт, лекцийг ч мөн зохион байгуулах юм байна.
Монгол Улсын Ерөнхийлөгчийн Тамгын газар 2011 оноос эхлэн монгол бичгийн уран бичлэгийн “Мөнх тэнгэрийн бичиг” шилдэг бүтээлийн үзэсгэлэнг зохион байгуулж, үзэсгэлэнд оролцсон бүтээлээр товхимол хэвлүүлж ирсэн юм.
Энэ дагуу Монгол бичгийн хэрэглээг нэмэгдүүлэх, сурталчлан таниулах зорилгоор Сэлэнгэ, Баянхонгор, Дундговь, Архангай, Орхон аймаг, Нийслэлийн Багануур дүүрэгт монгол бичгийн уран бичлэгийн үзэсгэлэн, сургалтыг зохион байгуулаад байна.
Мөн Монгол Улсын Ерөнхийлөгчийн цахим хуудсыг монгол бичгээр хөтөлж Ерөнхийлөгчийн бодлого, үйл ажиллагааг дэлхийн хаанаас ч унших боломжийг бүрдүүлэн ажиллаж байгаа билээ.
Б.Даваахүү