Чөлөөлөх дайны ялалтын 70 жилийн ойн баярын хурал, хүндэтгэлийн тоглолт нийслэлийн Соёлын төв өргөөнөө боллоо.
Дэлхийн хоёрдугаар дайны сүүлчийг мушгиж, эх оронд минь өнгөлзөгч харийн дайсныг даралцаж явсан эрхэм буурлуудын энгэрт одон тэмдэг гялалзана. Сэтгэлд нь харин энх цагийг авчралцсан омогшилтой нь хамт мөр зэрэгцэн тулалдаж явсан ч эргэж ирээгүй нөхдөө үгүйлэх харамсал хургаж буй нь лавтай. Тэдний халуун дурсамжийг сэдрээж, дарийн утаа үнэртсэн, дайны талбараас эдүгээгийн энх цаг хүртэлх эх орон, эрх чөлөө, элбэрэл хайрыг өгүүлэх дуу, бүжиг, хөгжмийн цоморлиг болсон сайхан тоглолтыг Цэргийн дуу бүжгийн Эрдмийн чуулгын уран бүтээлчид өргөн барилаа.
Эр нөхрөө дайнд үдэх эгэлхэн монгол бүсгүй шаналлыг бүжигчин Х.Юүлэхорол харцаараа, үйл хөдлөлөөрөө харуулж чадсан бол тулаанд мордсон дайчин эрсийг аав ижий нь, хань үр хүүхдээс нь гадна нутгийн уулс нь өндөлзөн хүлээдэг талаар дуучин А.Болормаа бүжигчин бүсгүйчүүдийн хамт сэтгэл үерлэтэл дуулан хүргэлээ.
Энэхүү тоглолтод цэнхэр дурдан алчуур, ялалтын улаан туг ихээхэн "гол дүр"-ийг бүтээсэн нь үнэхээр л ялалтын 70 жилийн ойг тэмдэглэж байгааг минь байн байн сануулж байлаа.
Мөн 70 жилийн тэртээ манай чуулгынхан нэг гартаа буу бариад, нөгөө гараараа хөгжмөө тэврээд дарийн утаа, дайны гал дундуур цэрэг эрстэй мөр зэрэгцэн явсан аугаа түүх үнэн билээ. Өнөөдөр тайзан дээр чуулгын тэр үеийн ахмад үеийнхэнтэй мөр зэрэгцэн явсан, 1945 оны байлдагч, Дундговь аймгийн Эрдэнэ сумын уугуул, ахмад дайчин СТА Д.Цэрэндаш гуай манай хөгжимчидтэй эвлэгхэн аргагүй хоршин дуулсан нь үзэгчдийг бүр огшоочихож билээ.
Ингээд Ардын жүжигчин, гавьяатууд цөм бүрэн, дурсамж сэдрээж, сэтгэл огшоосон сайхан тоглолтыг үзсэн ахмад дайчид сэтгэл өндөртэйгээр гарцгаалаа. Тоглолтын ерөнхий найруулагчаар УГЗ Ч.Ганхуяг ажилласан бол Шанхайд хөгжмийн урлагийн чиглэлээрээ мэргэжил дээшлүүлээд ирсэн ерөнхий удирдаач Б.Энхбаяр тоглолтын турш дохиж, монголын үзэгчидтэйгээ дахин учран золголоо.
