“Алтан намар 2015” хөгжмийн наадам энэ жил 34 дэхь удаагаа уламжлал болон энэ сарын 21-25 ны өдрүүдэд зохион байгуулагдлаа. Энэ жилийн наадмыг Монголын хөгжмийн зохиолчдын холбоо, БСШУЯ хамтран зохион байгуулсан юм. Наадмын хүрээнд нэрт хөгжмийн зохиолч С.Гончигсумлаагийн мэндэлсний 100 жилийн ойг тохиолдуудлан шилдэг бүтээлүүдийг толилуулсан бөгөөд нэрт хөгжмийн зохиолч Ц.Чинзоригийн мэндэлсний 60 жилийн ойн хүрээнд зохиолчийн дан хөгжмийн болон дууны концертыг тоглосон юм.
Энэ жилийн наадамд 22 хөгжмийн зохиолч 30 гаруй бүтээлээ сойсноос шилдэг есөн бүтээлийг тоглолтын үеэр хүргэж, төрийн урын санд худалдан авах зургаан бүтээлийг тодруулсан байна. Үүнд, хөгжмийн зохиолч Г.Төвшинтөрийн “Эвэр бүрээ, үндэсний найрал хөгжимд зориулсан рапсоди”, Ш.Өлзийбаярын “Төгөлдөр хуурын рапсоди”, Б.Батболдын “Чавхдаст хөгжимд зориулсан дөрвөл”, Д.Ариунболдын ятга симфони найрал хөгжимд зориулсан “Ятгын аялгуу”, Э.Доржсүрэн “Төгөлдөр хуур, симфони найрал хөгжимд зориулсан радсоди”, Б.Энхбаярын “Оршихуйн үнэн” ораторын хоёрдугаар анги багтсан юм. Улс орны эдийн засаг хүндхэн байгаа гэсэн шалтгаанаар БСУШЯ-наас уг наадамд санхүүгийн дэмжлэг үзүүлээгүй ч олны дэмжлэгээр “Алтан намар”наадам боллоо. Хаалтын тоглолтын үеэр “Үйлдвэрлэл дагнасан сэргэн мандалт” группийн үүсгэн байгуулагч Б.Төмөрчулуун ирэх жилийн наадмыг ивээн тэтгэнэ гэдгээ албан ёсоор зарласан нь уран бүтээлчдэд томоохон бэлэг барьсан юм.
Төрийн хошой шагналт, хөгжмийн зохиолч Н.Жанцанноровын ая, Д.Цэдэвийн шүлэг “Алтан намар” дууг Ардын жүжигчин Б.Зангад амилуулсан билээ.
Ургацын талбайд хөгжөөн тасрахгүй
Уудам бэлчээрт шуугиан татрахгүй
Алтан намар он жил улиран дуурсгалтай
Аяны шувуудыг дагаад нисчихгүй нь сайхан
Ай даа намар цаг
Алтан сайхан цаг …
