Харсан хүн бүрийг инээлгэдэг алдарт жүжигчин Робин Уилльямсын амьдрал тоглосон кино шигээ, эсвэл олны төсөөлж боддогчлон сайхан биш байсныг түүнийг харамсалтайгаар нас барсны дараа дэлхий даяараа мэдсэн билээ.
Амиа хорлож энэ хорвоог өөрийн хүслээр орхисон алдарт жүжигчинд амьдралаа дуусгах шалтгаан байсан гэдгийг бэлэвсэрч үлдсэн эхнэр нь “Good Morning America” нэвтрүүлэгт ярилцлага өгөхдөө анх удаа дэлгэжээ.
Нөхрөө нас барснаас хойш анх удаа телевизэд ярилцлага өгсөн Сюзан Шнайдерын ярьснаар Робин Уилльямсын амьдралын сүүлчийн өдрүүд хар дарсан зүүд шиг өнгөрчээ.
2014 оны наймдугаар сарын 11-нд Робин Уилльямс гэртээ өөрийгөө дүүжилж амиа егүүтгэжээ гэсэн мэдээ тарж, дэлхий даяар түүний шүтэн бишрэгчид цочирдон хүлээн авсан. Энэ хүртэл түүний амьдралд чухам юу тохиолдсоныг олон нийт мэдээгүй юм. Тэгвэл тэр өдрөөс гурван сарын өмнө Робин Уилльямс Паркинсоны өвчтэй гэдэг нь оношлогдоод байжээ.
Бүр 2013 оны арваннэгдүгээр сараас Паркинсоны өвчний анхан шатны шинж тэмдэг илэрсэн бөгөөд 2014 оны тавдугаар сард эмч нар албан ёсоор тогтоосон байна. Гэвч энэ бол түүнд тохиолдсон ганц бэрхшээл биш байжээ. Алдарт жүжигчин деменция хэмээх сэтгэцийн өөр нэг хавсарсан өвчинд нэрвэгдсэн байж. Гэхдээ оюун ухаан муудах, солиорлын хэлбэрийн энэ өвчнөөр өвдсөнийг амиа алдсаных нь дараа задлан шинжилгээ хийх хүртэл оношлоогүй байсан юм. Түүнийг эмчилж байсан эмч нар өвчний шинж тэмдэг илэрч буйг мэдээд нарийн шинжилгээнд оруулъя хэмээн амиа хорлохоос нь хэдхэн хоногийн өмнө хэлсэн байж. Харин шинжилгээнд орохоос өмнө амиа егүүтгэсэн нь Робин Уилльямс өдөр ирэх тусам хүндэрч буй өвчнөөсөө залхаж, бас оношийг нь сонсохоос айсных гэж бодож буйгаа эхнэр нь ярьжээ.
Робин Уилльямс амьдралынхаа сүүлчийн өдрүүдэд өөрт нь илрээд буй өвчний шинж тэмдгээс болж маш их цухалдаж, сэтгэл гутралд ороод байж. Тухайлбал, долдугаар сарын 24-нд ариун цэврийн өрөөндөө цусанд хутгалдсан хэвтэж байхад нь эхнэр нь олжээ. Толгойгоороо тасралтгүй шал мөргөж, цусандаа будагдсан түүнээс яасныг асуухад хаалга руу заасан гэнэ. Хаалга мөргөчихсөн юм уу гэхэд толгой дохиж байжээ. Деменция өвчний үед хараа муудаж, аливаа зүйлийг бодитоор харж чадахаа больдог учир тэрээр хаалгыг харалгүй мөргөж толгойгоо гэмтээсэн байж.
Деменция өвчний үед хий юм харах, байхгүй хүн, амьтан, эд зүйлийг байгаа мэтээр сэтгэх, эсвэл аль эрт нас барсан дотны хүнтэйгээ ярих гэх мэт шинж тэмдэг ч илэрдэг байна. Өвчний улмаас түүнд тохиолдож буй хачирхалтай явдлууд, биеэ авч яваа байдлыг нь хүмүүс гайхан харахад тэр маш их бухимддаг байсныг ч эхнэр нь ярьжээ. Өөрт тохиолдсон энэ бүх явдлыг тэр тэсвэрлэж чадахгүй, өөрөө бүхнийг зогсоох гэсэндээ л амиа егүүтгэжээ гэдгийг эхнэр нь өнгөрсөн хугацаанд ойлгосон хэмээн нулимстайгаар өгүүлсэн байна.
Гэхдээ Робин Уилльямсын эхнэрт сэтгэл тайвнаар өнгөрснөө бодох, гашуудах хугацаа бараг байгаагүй юм. Алдарт жүжигчний өмнөх эхнэрийн хүүхдүүд түүнтэй эцгийнхээ өв хөрөнгөөс болж маргалдан, шүүхдээд дөнгөж өнгөрсөн сард тохиролцсон гэнэ. Робин Уилльямс гэрээслэлдээ бичихдээ эхнэртээ үл хөдлөх хөрөнгө болон мөнгөн хөрөнгөө захиран зарцуулах эрх олгосон ч хүүхдүүд нь Сьюзан Шнайдерыг хэтэрхий шуналтаж, эцгийнх нь бүх хөрөнгийг эзэмших гэлээ хэмээн заргалдсан юм.
Эх сурвалж: Dailymail
Б.Сэвжидмаа
