БНХАУ-ын иргэн Цянь Цянь энэ жил 31 настай, 224 кг жинтэй. Жин хасах гэж төрөл бүрээр оролдсон ч төдийлөн амжилтанд хүрээгүй учраас мэс заслын аргаар жингээ хасахаар өнгөрсөн 10-р сард анх эмнэлэгт хандсан байна.
Нэг суурин дээр 100 ширхэг кебаб идсэн ч цаддаггүй Цянь Цянь бүсгүй жингээ хасч чадвал энгийн амьдралд орж, хайр дурлалтайгаа учирна гэж найдаж байгаа аж. Хэт илүүдэл жингээс улбаалж Цянь Цянь бүсгүй алхах, амьсгалахад хүртэл хүндрэлтэй болсон учраас энэ сарын эхээр жин бууруулах анхны мэс засалдаа оржээ.
Бүсгүй бусад хүүхдийн адил жинтэй төрсөн ч эцэг эх нь охиноо харж хандах завгүй учраас хөдөө амьдардаг эмээ нь өсгөжээ. Эмээгийнхээ гарт ирсэн үеэс Цянь Цянь охины хоолны дуршил бусад хүүхдээс 3 дахин их болжээ. Түүний эргэн тойрны хүмүүс охиныг багадаа маш уйланхай байсан гэж ярьдаг байна.
Жирийн 9 сартай хүүхдүүд бууз баншнаас нэгийг арай гэж иддэг бол Цянь Цянь зургаан бууз иддэг байжээ. Бага сургуульд орохдоо л тэр ангийнхнаасаа хоёр дахин их жинтэй байсан бол коллежид элсэх үедээ 322 кг жинтэй болсон байна.
Тэрээр “Би амьдралдаа нэг ч удаа цадталаа идэж үзээгүй. Яаж ч их идсэн би цаддаггүй. Найзууд маань бүгд хүнтэй гэрлэж хүүхэдтэй болсон, харин би энэ тухай бодож ч зүрхэлдэггүй” гэжээ. Нэгэнт хүний нүүр харж чадахгүй таргалсан учраас Цянь Цянь сүүлийн зургаан жил гэрээсээ гаралгүй хүний нүднээс нуугджээ. Хятадын хамгийн тарган гэгдэж байсан бүсгүй хэт таргалалтаас улбаалж амиа алдсан үйл явдал Цянь Цянийг ихэд айлгаж, эмнэлэгт хандаж, мэс засал хийлгэхэд хүргэжээ. Хэрэв Цянь Цянь энэ хэвээрээ таргалсаар байвал 40 нас хүрэлгүй амьсгал хураах гэнэ.
Эх сурвалж: Hiub.mn
