Хайртай гэдэг үгийг ховорхон агаад эгзэгийг нь олоод хэлчихдэг
Хэзээ ч хаана ч ямарч үед хоёр биенээ хүндэлчихдэг
Хувирамтгай зан гаргалгүй үргэлж чамайг ойлгодог
Хэний ч дэргэд өөрийнхөөрөө байж бусдын хүндэтгэлийг олчихдог
Бодсон санасан бүхнээ нууж хаалгүй илэрхийлчихдэг
Буруу зөрүү үйлдэлдээ сэтгэл зовинон харамсдаг
Бор нэрмэл дарсыг тунгийг нь тааруулаад хүртчихдэг
Бурхан шүтээн ууландаа сэржим өргөн залбирчихдаг эрийг
Аавтайгаа зүйрлэж ахтайгаа жишэж сонгоорой охид минь
Нударга унжуулсан дээлийг хээ шаагүй хайш яашхан өмсчихдөг
Настай буурал ижийдээ хүндлэл энэрлийг үзүүлчихдэг
Найз нөхөдөө ирэхэд нь элдэвийг хуучлан хөөрөлдчихдөг
Намбалаг дөлгөөн төрхөндөө буян дуудан налайдаг
Харын өвчинд захирагдалгүй хань ижилдээ итгэдэг
Хал зовлон тохиолдоход ч түшээд авах хаттай
Харсан таалагдсан нэгэндээ хөл алдан гүйхээргүй
Халамж энхрийлэл хоёроор бүсгүй хүнийг жаргаачихдаг
Хийморлог тэнгэрлэг эрийг бүү алдаарай охид минь
Хэтэвч нимгэнтэй хэрнээ хүнэлэг чанарыг өвөрлөсөн
Хангалуун тансаг биш ч холын бодол тээсэн
Хэргэм зэрэг хүртээгүй ч амьдралын ухаанд нухлагдсан
Хэлсэн үгс нь хатуу дориун ч итгэл даах найдвартай
Булай бузар зүйлээс холуур өнгөрөх ухамсартай
Булиглах борхон зүрхэндээ үр хүүхдээ дээдэлсэн
Бурханлаг гэгээн оюундаа алс холын зорилоготой
Бусдаас онцгой ийм л залууг ханиа болгож ханилаарай охид минь ээ
Н.Сүглэгмаа