Манай үеийн домогт хөлбөмбөгчдийн нэг Месси өөрийнхөө хамгийн үнэнч хөгжөөн дэмжигч Афган хүү Муртаза Ахмадиг Испанид урьжээ. Хөлбөмбөгт үнэн сэтгэлээсээ дуртай, Мессигийн хөгжөөн дэмжигч таван настай энэ хүүд тариачин эцэг эх нь жинхэнэ өмсгөл авч өгөх мөнгөгүйгээс хүү цэнхэр уутаар өөртөө өмсгөл хийж өмссөн нь олны хайрыг татсан юм. Түүний зураг олон нийтийн сүлжээгээр тарсаар алдарт хөлбөмбөгчинд хүрсэн бөгөөд хэрвээ хүүг олвол түүнтэй заавал уулзаж, жинхэнэ өмсгөл бэлэглэнэ хэмээн Месси амласан билээ. Тэгвэл Барселона багийн од амласандаа хүрч хүүг багийнхаа цэнгэлдэх хүрээлэн Кэмп Ноуд урьжээ. Муртаза Ахмади хүү үнэхээр Испани явж, домогт хөлбөмбөгчинтэй уулзах гэж байгааг Афганистаны хөлбөмбөгийн холбоо ч баталжээ. Энэ тухай түүний багийн тоглогч, Бразилийн од Неймар Твиттертээ жиргэжээ.
Эх сурвалж: www.new.mn
