Шөнө орой унтах үед гэнэт хөлийн булчин зангирч шөрмөс татдаг. Заримдаа орой болгон шөрмөс татах нь ч бий. Тэгвэл “DailyMail” сонин яагаад хүний шөрмөс татдаг болохыг тодруулжээ. Ингэхдээ нэгэн судалгааг хийсэн байна.
Тэд 30-65 насны 1000 хүнийг судалгаанд хамруулан “Орой унтахаар хэвтэх үед шөрмөс чинь татдаг уу?” хэмээн асуужээ. Ингэхэд тэдний 97 хувь нь шөрмөс хааяа нэг татаж байсан, 60 хувь нь шөрмөс татсан үед яахаа мэднэ хэмээн хариулжээ. Харин тэдний нэг нь ч шөрмөс яагаад татдаг болохыг мэдэхгүй байлаа.
Судалгаанд оролцсон хүмүүсийн дийлэнх нь шөрмөс татсан үед иллэг, массаж хийдэг болохоо мөн дурджээ. Гэлээ гээд иллэг хийн цусан хангамжийг дэмжин иллэг хийж болох ч энэ нь эрдэс, амин дэм дутагдлыг арилгаж чадахгүй.
Шөнө хөл, гарын булчин зангирч шөрмөс татах нь хүний биед магни дутагдсанаас болдог ажээ. Магни нь ногоон өнгөт хүнсний ногоо, буурцагт ургамал, үр тариа, самранд ихээр агуулагддаг байна. Тиймээс эдгээр хүнсний бүтээгдэхүүнүүдийг хэрэглэж магнийн дутагдлаа нөхөх боломжтой. Гэхдээ хүнс тэжээлээс авч буй магни нь хүний биеийн эсэнд шууд шингэх нь удаан, үр нөлөө нь бага байдаг.
Хоол судлалын эрдэмтэн Эмма Derbyshire “Европын орны ихэнх хүмүүс хангалттай магни авч чадахгүй байгаа бөгөөд тэдний 50 хувь нь магнийн дутагдалтай байдаг” хэмээн ярьжээ.
Үүнийг зохицуулах үүднээс Израйлийн Хаима Шиба Тель ха-Шомер эмнэлгийн эрдэмтэд хоёр долоо хоногийн хугацаанд магнийн дутагдлыг нөхөх В6, Е аминдэмийн найрлагатай магнийн исэл болох бэлдмэлийг гаргаж авсан байна. Уг бэлдмэлийг хэрэглэсэн хүмүүсийн 82 хувь нь шөрмөс татах нь больсон, 6 хувь нь буурсан хэмээн хариулжээ. Магнийн исэл нь шууд эс рүү нэвтэрч, хүний бие дэх тэнцвэрт бус байдлыг арилгадаг.
Гэлээ ч эрдэмтэд магнигаар баялаг хүнсийг өдөр тутмын амьдралдаа байнга хэрэглэж байхыг сануулж байна.
