 |
UBS телевизийн уран бүтээл “Содура” уран сайхны кино ирэх тавдугаар сард болох Каннын кино наадамд өрсөлдөхөөр болжээ. Цаа буга маллан үе дамжин тайгад амьдарч буй уйгар угсааны тува цаатан иргэдийн аж байдалд орж буй өөрчлөлт, ёс уламжлалын тухай, ан амьтнаа хэрхэн хайрлаж хамгаалдгийг дэлхийн хүмүүс үзэж манай уран бүтээлчдэд үнэлгээ өгөх нь. Каннын кино наадам нь олон улсын төвшинд кино театр, кино урлагийн хөгжилд хувь нэмэр оруулж, дэлхий даяар кино үйлдвэрлэлийг нэмэгдүүлэх болон хөгжүүлэх, дэмжих зорилгоор зохион байгуулдаг томоохон нөлөө бүхий наадам билээ. Наадамд өрсөлдөх киноны тоонд багтах албан ёсны шалгаруулалт бүхий олон удаагийн үзлэг , шалгуур олон бий. Ийм нэр хүндтэй наадмын тэргүүн дээд шагнал Palme d Or буюу “Алтан далдуу мод”-ны төлөө монгол киночид өрсөлдөнө гэдэг соёл урлаг , тэр дундаа үндэсний кино үйлдвэрлэлийн салбарт тохиох том үйл явдал юм.
