"Гэгээн Муза" Академи, ITI /Олон улсын театрын институтийн Монгол дахь төв/ нь Нийслэлийн засаг даргын тамгын газар, Боловсрол, Соёл, Шинжлэх, Ухааны яам, Улсын драмын эрдмийн театртай хамтран “Гэгээн Муза-13” олон улсын театрын наадмыг зохион байгуулах гэж байна. Тус наадамд нэр дэвшиж байгаа бүтээлүүд энэ оны тавдугаар сарын 1-7-ны өдрүүдэд УДЭТ-ын тайзнаа тавигдах юм. Улмаар “Гэгээн муза”-ийн эздийг УДЭТ-театрт тавдугаар сарын 7-ны өдөр тодруулж шагналыг гардуулна.
“Гэгээн Муза” наадам хүмүүнлэгийн үйл ажиллагаанд тодорхой хувь нэмэр оруулах зорилгоор энэ жилээс наадмын хүүхдийн жүжгийн төрөлд нэр дэвшсэн уран бүтээлээс тухайн бүтээлийн уран бүтээлийн байгууллага, Нийслэлийн хүүхэд, гэр бүл, хөгжлийн газартай хамтран харааны бэрхшээлтэй хүүхдэд зориулсан хүүхдийн жүжгийн аудио CD-г хэвлэн гаргах гэж байгаа ажээ.
Энэ дашрамд дуулгахад нэг хүний жүжгийн төрөлд зочин шүүгчээр “Peace and Respect” олон улсын театрын фестивалийн дарга, Киргиз улсын Бишкекийн Драмын театрын уран сайхны удирдаач, театр судлаач, найруулагч Umuralieva Tsytsygma оролцох юм. Мөн энэ жилийн наадмаас эхлэн Гранприг БСШУЯ-ны нэрэмжит болгон гардуулах болсон бөгөөд "Шилдэг залуу уран бүтээлч" номинацийг Монголын урлагийн залуучуудын холбоо уламжлал болон гардуулахаар болжээ.
Энэ жилийн наадмын шагналын төрөл нь:
- Шилдэг уран бүтээлчдийн "Муза"
- Монголын урлагийн залуучуудын холбооны нэрэмжит “Шилдэг залуу”
- “Гэгээн Муза Академи”-ийн нэрэмжит ахмад уран бүтээлчдэд олгодог “Хүндэт Муза”
- Шүүгчдийн нэрэмжит “Тусгай шагнал”
- БСШУЯ-ны нэрэмжит шилдгийн шилдэг бүтээлд олгох “Гранпри” тус тус шагналуудыг “Гэгээн Муза-13” дахь наадамд өрсөлдсөн бүтээлүүдээс шалгаруулах юм.
Наадмын хүрээнд өнөөдөр “Гэгээн Муза-13” олон улсын театрын наадамд нэр дэвшсэн бүтээл болон уран бүтээлчдэд батламж гардуулах үйл ажиллагаа болсон юм. Ингээд та бүхэндээ батламж гардуулах арга хэмжээ, хэвлэлийн хурлаас бэлтгэсэн фото сурвалжлагыг хүргэж байна.
О.Номин
-
1
-
2
-
3
-
4
-
5
-
6
-
7
-
8
-
9
-
10
-
11
-
12
-
13
-
14
-
15
-
16
-