"Монголын морин спорт, залуу уяачдын холбоо" анхдугаар чуулганаа 10 дугаар сарын 07-нд Улаанбаатар хотноо 18 аймгийн 200 гаруй төлөөлөгч оролцож амжилттай зохион байгуулсан билээ. ММСЗУХ нь Монголчуудын морины соёлыг дэлгэрүүлэх, олон зуун жилийн уламжлалт түүхтэй хурдан морины уралдааныг хөгжүүлэх, Монгол орны өнцөг булан бүрт ажиллаж амьдарч буй залуу уяачдаа дэмжих зорилготойгоор үйл ажиллагаагаа явуулдаг юм.
ММСЗУХ-ны Орхон аймаг дахь салбарын анхдугаар чуулганыг 12 дугаар сарын 12-нд Эрдэнэт хотын Хүүхдийн ордонд амжилттай зохион байгууллаа. Уг чуулганд Орхон аймгийн ЗДТГ-ын Хөгжлийн бодлогын хэлтсийн дарга Г.Батдэлгэр, ММСУХ-ны Орхон аймаг дахь салбарын ажлын албаны дарга н.Энхтөр нар мэндчилгээ дэвшүүлж цаашид дэмжиж хамтран ажиллахаа илэрхийллээ.
Мөн ММСЗУХ-ны Ерөнхий нарийн бичгийн дарга Н.Мөнхбаясгалан залуу уяачдын холбооны танилцуулга, үйл ажиллагааны төлөвлөгөөг танилцуулж, Удирдах зөвлөлийн гишүүн Ж.Цэнд-Очир Монгол морины уралдааны өнөөгийн байдал тулгамдаад байгаа асуудлын талаар илтгэл тавьж хурлын даргаар оролцлоо.
Чуулганд Орхон аймгийн залуу уяачдын төлөөлөл 100 гаруй уяачид оролцож нээлттэй санал хураалтаар ММСЗУХ-ны Орхон аймаг дахь салбарын Тэргүүнээр Батсайханы Тэгшбаярыг 100 хувийн саналаар сонгож ММСЗУХ-ны Ерөнхийлөгчийн батламжийг гардууллаа. Мөн тэргүүлэгч гишүүдээр 17 хүнийг, хяналтын зөвлөлийн гишүүнээр 5 хүнийг сонгож анхны салбар холбоо амжилттай байгуулагдлаа.
Дашрамд дурдахад ММСЗУХ-ны 2017 оны нэгдүгээр улирлын ажлын төлөвлөгөөнд 21 аймагт салбар холбоогоо байгуулах ажил тусгагдсан байгаа билээ.
