Урд хормойгоо буянт малынхаа сүүгээр цавцайтал мялаасан
Урт хархан гэзгээ ар нуруундаа сууналзуулан орхисон
Улаахан хацартай ичимхий зантай монголжингоо минь чи
Уул талыг чимсэн үзэсгэлэнт зэрлэгхэн сарнай буюу
Улаахан хацартай ичимхий зантай монголжингоо минь чи
Уул талыг чимсэн үзэсгэлэнт зэрлэгхэн сарнай буюу
Саалийн хувингаа тохойндоо зүүгээд зэл рүү намбайтал алхсан
Сайхан цагаан шүдээрээ гайхуулж дэлхийг уяртал мишээсэн
Цайлган сэтгэлээрээ цацлаа өргөсөн монголжингоо минь чи
Цайдам тал хөндийн танхилхан согоо буюу
Цайлган сэтгэлээрээ цацлаа өргөсөн монголжингоо минь чи
Цайдам тал хөндийн танхилхан согоо буюу
Тогоруун дууны сүүлч үдэлтийн дуугаа гунигтай аялах тэр л шөнөөр нь
Тооноор туссан сарны туяанаас манцуйтай үрээ харамласан
Тормогорхон нүдэндээ энэрэл шингээсэн монголжингоо минь чи
Толгодын энгэрт дэлбээлсэн лянхуа цэцэг буюу
Тормогорхон нүдэндээ энэрэл шингээсэн монголжингоо минь чи
Толгодын энгэрт дэлбээлсэн лянхуа цэцэг буюу, лянхуа цэцэг буюу
