“Парис-2024” олимпын наадмын хөтөлбөрт шинээр нэмэгдсэн спортын төрөл нь та бидний гудамжны бүжиг хэмээн нэрлэж ирсэн брейкинг юм. Тэгвэл Олон Улсын Олимпын Хорооноос брейк бүжигчдийн олимпын эрх авах форматыг баталжээ. Тодруулбал нэг улсаас эрэгтэй, эмэгтэй тус бүр хоёр тамирчин олимпт оролцож болох бөгөөд тамирчид ганцаарчилсан төрөлд хасагдах системээр өрсөлдсөөр олимпын медальтнууд тодрох юм байна.
Парисын олимпт эрэгтэй, эмэгтэй тус бүр 16, нийт 32 бүжигчин өрсөлдөнө. Эднээс 20 бүжигчин нь 2024 оны 3-6-р сард зохиогдох гурван үе шаттай тэмцээнээс эрхээ авах юм. Мөн таван эрэгтэй, таван эмэгтэй тамирчин тивүүдийн тэмцээнээс эрхээ авах учиртай. Тухайлбал, Ханжоугийн Азийн наадамд түрүүлсэн тамирчин олимпын эрхээ шууд авна. Үүн дээр 2023 оны ДАШТ-д түрүүлсэн эрэгтэй, эмэгтэй тус бүр нэг бүжигчин нэмэгдсэнээр 32 тамирчин бүрдэх аж.
Энэ дашрамд дуулгахад “Монголын спорт брейк бүжгийн холбоо” ирэх 9 дүгээр сард албан ёсны анхдугаар чуулганаа зохион байгуулж холбооны бүтэц бүрэлдэхүүн, дүрэм журмаа баталж, “Парис-2024” олимпын наадмыг хүртэлх үйл ажиллагааны төлөвлөгөөгөө батлахаар бэлтгэл ажилдаа ороод байгаа аж.
Эх сурвалж: Монголын спорт брейк бүжгийн холбоо
