Нийслэлчүүдийн сайн мэдэх атар талхыг савалгаатай зардаг болбол одообайгаа үнэ дээр нь даруй 200-250 төгрөг нэмж худалдаалдаг болох гэнэ. Учир нь Нийслэлийн мэргэжлийн хяналтын газар шийдвэр гаргаж, “Атар” талхыг савлаж зарах ёстой гэж үйлдвэрлэгч “Атар өргөө”, “Талх чихэр” компаниудад шаардлага тавьсан байна. Үүний хариуд үйлдвэрлэгчид “савалгаатай болбол 200-250 төгрөгөөр үнэ нэмнэ” гэжээ.
Мэдээж бусад талхнуудтайгаа адил гялгар уутанд хийж савлах нь тодорхой. Дэлгүүрийн худалдагчид талхыг үнэгүй уутанд хийж өгж болоод байхад тэр том компани байж ганц савалгаа нэмээд л шууд 200-250 төгрөгөөр нэмнэ гэж байгаа нь арай л хэтэрхий. Гялгар уут ямар үнэтэй билээ бөөнөөр нь авч өөрсдийн шошго тэмдгийг дээр нь хэвлээд хэвлээд 200 төгрөгийн өртөг гарах уу? Нэмлээ нэмлээ гэхэд 20,30 төгрөг л болно. Талх үйлдвэрлэгч дээрхи компаниуд ингэж шуналтай загнаж болохгүй.
Дашрамд дурьдахад, өнгөрсөн тавдугаар сард НМХГ-аас нийслэлийн хэмжээнд гурилан бүтээгдэхүүний үйлдвэрлэл эрхэлдэг 94 үйлдвэр, цехэд хяналт шалгалт хийжээ. Шалгалтаар зөрчилтэй байсан 22 үйлдвэрт зөрчлөө арилгах үүрэг өгч, 18 үйлдвэрийн үйл ажиллагааг түр хугацаагаар зогсоож, зөрчил дутагдлыг арилгуулсан байна.
Г.Ангараг
