Попын хатан хаан дуучин Мадонна өчигдөр хойд хөршийн нийслэлд томоохон тоглолт зохион байгууллаа.
“Олимпийский” спортын ордонд ганц удаа болсон энэхүү тоглолтод бүжигчид нийлсэн 120 орчим хүн оролцсон аж.
Харин арын албанд 400 орчим хүн хүчин зүтгэж, тоглолтын тайз засалт, гэрэл чимэглэлийг гүйцэтгэсэн. Мөн 44 ачааны автомашинд ачсан тоног төхөөрөмжүүдийн дунд маш том өргөн дэлгэцээр үзэгчдэд тоглолтыг хүргэжээ.
Өдгөө 53 настай дуучин эмэгтэй тоглолтынхоо үеэр MDNA цомгийнхоо дуунуудаас фэнүүддээ хүргэсэн ба аялан тоглолтын зохион байгуулагчид мэдэгдэхдээ “Энэ бол XXI зууны хосгүй шинэлэг дизайн, найруулагчийн шийдэлтэй тоглолт” гэж онцолжээ.
Дуучин Мадонна барууны сэтгүүлд өгсөн ярилцлагадаа “Сэтгэл хөдлөлөөр маш дүүрэн байна. Миний тоглолтыг Оросын олон мянган хүн үзэж сонирхлоо. Нэг өдөр тоглосондоо сэтгэл дундуур байна. Гэхдээ миний аялан тоглолтын хуваарь маш шахуу байгаа” гэжээ.
