1990-ээд оны эстрад урлагт уянгын сайхан дуугаараа хөл тавьж орж ирсэн “Титэм” хамтлагийг тэр үеийн залуус андахгүй. Тэгвэл тус хамтлагийн ая зохиогч, дуучин Л.Тайванбат Хөгжим бүжгийн сургуулиасаа өөрийн дүүгийн хамт дөрвөн авьяаслаг хүүхэд олж “Камертон” нэртэй хамтлаг байгуулж, продюссерээр нь ажиллан од болгосон түүхэн гавьяатай хүн.
Харин түүний гавьяа зүтгэлийг төр, засаг, соёлын байгууллага нь нэг ч удаа үнэлээгүй учраас одоо болтол СТА гэсэн цол, тэмдэггүй яваа ажээ. Үүндээ ч гутарсан уу нэг хэсэг бор дарсанд орсон хэдий ч “Эр хүн долоо дордож, найм сэхдэгийн” үлгэрээр одоо тэрбээр уран бүтээлийн ажилдаа ид ороод байна.
Налгар зуны найр, наадмын энэ цаг үед продюссер Л.Тайванбат аавынхаа төрсөн нутаг Хөвсгөлд очин өөрийн төрсөн дүү Л.Ган-Эрдэнийн бие даасан цомогт зориулж олон дуу зохиож суугаа гэнэ.
Г.Амар
