Нэрт зураач Эдуард Манегийн 1868 онд бүтээсэн Фанни Клаус гэдэг эмэгтэйн хөрөг зургийг худалдаж авахын тулд Британийн урлагийн сангууд болон хувь хүмүүс 7.83 сая фунт стерлинг цуглуулжээ. Энэ зурган дээр их зураач өөрийн эхнэрийн найз бүсгүйг дүрсэлсэн аж. Энэ зургийг нэгэн гадны худалдан авагч 28.35 сая фунт стерлингээр худалдаж авсан бөгөөд удахгүй хил давуулах ёстой байсан юм.
Харин тус улсын Соёлын сайд Эд Вайзи энэ ховор урлагийн бүтээлийг хил давуулахыг зөвшөөрөөгүй байна. Ингээд Оксфордын Эшмолин музейн удирдлагад уг хөрөг зургийг худалдаж авахыг санал болгожээ. Энэ музей Их Британийн хамгийн том урлагийн музейд тооцогддог билээ.
Энэхүү санаачлагыг ажил хэрэг болгохын тулд хөрөнгө цуглуулах ажлыг зохион байгуулжээ. Мөнгө ч цугларсан байна. 5.9 сая фунтыг Heritage Lottery Fund, 850 мянгыг The Art Fund, үлдсэн 1.08 сая фунт стерлингийг компани болон хувь хүмүүс найман сарын хугацаанд хандивласан аж. Ингэснээр Фанни Клаусын хөрөг зураг Их Британид үлдэхээр болжээ.
