“Аз жаргал the bad boy” киногоо үзэгчдэд хүргэсний дараа “Цадиггүй залуусыг өмөөрлөө” гэж адлуулаад авсан мань эр “Боолын гэрээ” киноноосоо болж гайгүй сайн зодуулсан гэлцдэг.
Уг киног продюссерлэж, найруулагч эртэй оровч гаравч хамтдаа явсан жүжигчин Х.Хүрэлхүү ч мөн энэ үеэр “ухамсрын шанаа” хүртсэн гэдэг юм билээ. Тэгвэл энэ мэт явдлаас хашраагүй найруулагч З.Батболд “Big Line Film“ студийнхээ уран бүтээлчидтэй хамт “Бурхан өршөөг” киногоо бүтээсэн юм.
Улстөрчдийн нууц хуйвалдаан, бохир бизнес, нийгэм дэх дарангуйлал, хүчирхийллийг тод томруунаар харуулсан энэ киноны дараа хэрхэх бол гэж бодсон уу, яасан. Аль эсвэл мань эрийн санааг илэрхий гаргаж тавьсан сэтгүүлчид хэлмэгдэнэ гэж болгоомжлов уу. “Сэтгүүлчдийг бурхан өршөөг.
Хөөрхийс минь, үнэний дуу хоолой болж явахдаа энэ нийгэмд буй дарангуйлагчдад их дээрэлхүүлдэг шүү дээ” гэж хальт өрөвдөөд авна лээ. Ингэж зориглосон эрхэм найруулагчийг ч гэсэн, бурхан өршөөг дээ. Харамсалтай нь, түүний шинэ киног дэлгэцэнд гаргахыг хориглосон төдийгүй эрхэм найруулагч дээшээ тэнгэр хол, доошоо газар хатуу гэгч болж яваа гэсэн шүү.
Р.Есүй
