|
Энэ бол Өмнөд Солонгосын дуучин Псайгийн “Гангнам Стайль” хэмээх дуу юм. Одоогоор түүний “Гангнам Стайль” дууны клип www.youtube.com-оор цацагдсанаас хойш даруй 39 сая хүн үзэж сонсчээ. Өнгөрсөн долоо хоногт түүний дууг интернетээр өдөрт 1 сая хүн үзэж байсан бол сүүлийн гурван өдөр 2 сая орчим хүн үзсэн байгааг дэлхийн хөгжмийн “Billboard chart” мэдээллээд байна. Дуучин Псайгийн “Гангнам Стайль” хэмээх энэхүү дууны үг, ая, хөгжмийн хэмнэл, клип нь бүгд цоо шинэ өнгө төрхийг илтгэсэн агаад бүжгийн шинэ төрлийн урсгал нь олон нийтэд тун их таалагдсан бололтой. Дуучин Псай хар тамхины хэрэгт холбогдон хэсэг хугацаанд урлагийн тайзнаас хөндийрөөд байсан юм. Тэгвэл шинэ уран бүтээлээрээ ийнхүү дэлхийн хөгжмийн ертөнцөд хүч түрэн орж ирж, гэнэтийн тэсрэлт хийж чадлаа. “Гангнам Стайль” дуу нь одоогоор “K-Pop Hot 100 chart”-ыг 4 долоо хоног алгасалгүй тэргүүлсэн амжилт тогтоогоод байна. Энэхүү хөгжилтэй, доргио хэмнэлтэй дуу баруунд, мөн Европын орнуудын хөгжмийн нэвтрүүлгээр өдөр тутам цацагдаж байгаа юм. Мөн Францын томоохон хөгжмийн нэвтрүүлгээр уг дууг зарлахдаа “Яг л морины нуруун дээр давхиж яваа мэт хөдөлгөөнөөр бүжгээ илэрхийлж бусдын анхаарлыг маш ихээр татан, тэднийг хөгжөөж, бас донтуулж байгаа уг дуу дэлхий нийтийг байлдан дагуулж байна” гэжээ. Тэгвэл дуучин Жастин Бейбэрийн менежер Скүүтер Браун Псайтай хамтран ажиллах боломжийг эрэлхийлж байгаа бололтой. Тэрээр: “Дэлхийн олон мянган үзэгч сонсогчдыг ганцхан дуу, ганц бүжгээр байлдан дагуулж, маанагдуу атлаа хөгжилтэй дүр төрхөөрөө танигдаж чадсан суперстартай уулзах боломж байгаа байх” хэмээн найдаж байгаагаа нуугаагүй байна. Псайгийн үнэнч шүтэн бишрэгчид түүний дууг хойшдоо ч олон долоо хоног хөгжмийн чартуудыг тэргүүлнэ гэдэгт итгэлтэй байгаа гэнэ. Ийнхүү тэрээр Өмнөд Солонгосын шоу бизнес дэлхий дахинд хүлээн зөвшөөрөгдөх болсныг гэрчиллээ. |
|
|
