АНУ-ын Индиана мужийн Эвансвиллын нэрэмжит Дүрслэх урлаг, түүх, шинжлэх ухааны музейн сан хөмрөгөөс нэрт зураач Пабло Пикассогийн “Улаан бүрхтэй эмэгтэй” уран зураг олдсон байна. Энэ бүтээл 1963 оноос тус музейд хадгалагдаж байсан хэдий ч данслах үеэр алдаа гарснаар сан хөмрөгт хэвтэх болсон гэнэ.
1950-иад онуудын үед түүнийг нэрт бизнесмэн Раймонд Лоуи худалдаж авсан бөгөөд хожим нь тус музейд бэлэг болгон өгчээ. Уран зургийг музейн сан хөмрөгт бүртгэх үеэр эндүүрэл гарснаар түүнийг нэр нь үл мэдэгдэх зураачийн бүтээлд тооцсон аж.
Энэхүү алдааг саяхан болтол хэн ч мэдээгүй байна. Пикассогийн уран бүтээлийг судлах ажлыг хийдэг нэгэн дуудлага худалдааны ордны төлөөлөгч тус музейн удирдлагад хандсанаар асуудал босчээ. Бүтээлийн эзэн тогтоогдсоноор тус музейн Захирлуудын зөвлөл энэ хөрөг зургийг худалдаалахаар шийдэв. Учир нь, тус музейн ажилчид урлагийн ийм ховор бүтээлийг чандлан хадгалж чадна гэдэгтээ эргэлзсэн аж.
Д.Ундрах
