-Яг одоо Та хаана байна вэ?
-Би яг одоо гэртээ байна. Хүмүүстэй уулзахаар товлосон болохоор удахгүй гарах бэлтгэлээ хийнэ.
-Нууц биш бол хэнтэй уулзах вэ?
-“V” студийнхэнтэй уулзахаар цаг тохирсон. Тэднийх миний сүүлийн үеийн уран бүтээл дээр ажиллаж байгаа юм. Дараа нь холоос ирсэн зочинтой уулзана даа.
-Фэнүүддээ шинэ уран бүтээлээр бэлэг барих гээд зав муутай байна уу?
-“V” студийнхэнтэй хамтран уянгын дуун дээр ажиллаж байгаа. Ер нь надад уянгын дуу цөөхөн байдаг юм билээ. Тиймээс энэ удаад энэ жанрын уран бүтээл хийхийг зорилоо. Студийнхэн шинэ тоног төхөөрөмжтэй болсон нь миний уран бүтээлийг илүү сайн болгох байх. “V” студийнхэн уран бүтээлчид дуун дээр ажиллахдаа мэдрэмжтэй ханддаг. Мөн клипний зохиол нь ч надад таалагддаг юм.
-Та өмнө нь Азийн загварлаг эмэгтэй дуучин номинацийн эзнээр шалгарч байсан. Энэ жил ч гэсэн тус наадамд оролцох гэж байгаа гэсэн?
-Азийн энэхүү наадамд уран бүтээлчдээс гадна шилдэг загвар зохион бүтээгч, олны танил моделиуд оролцдог. Энэ жилийн наадам товлосон хугацаанаасаа хойшлогдсон ч ондоо багтаан зохион байгуулна гэж мэдэгдсэн. Тиймээс саяхан зохион байгуулагчид гэрээгээ шинэчлэн хийсэн.
-Аялах төлөвлөгөө бий юу?
-Удахгүй миний оролцдог энергийн төвийн уулзалт болно. Энэ үеэр Малайз, Сингапур, Таивань, Хайнаниар аялна.
-Та загварлаг охидод зориулж дэлгүүр нээсэн. Уран бүтээл хийхийн зэрэгцээ бизнесийн ажлаа хослуулах нь амаргүй биз?
-Залуу хүн юу тарина, түүнийгээ хураадаг гэж боддог. Тиймээс нэг их түвэгшээдэггүй. Дуртай зүйлээ хийж байгаа болохоор сайхан байдаг юм. Харин ч зүгээр суухаар бие өвдөөд байгаа юм шиг санагддаг шүү./инээв/
Б.Сэлэнгэ
