Рок поп оддын энэ намрын анхны цугларалт 09 дүгээр сарын 21-ний баасан гаригт УБ Паласт болох гэж байна. Хөгжмийн зохиолч Г.Пүрэвдоржийн “Нандин эрдэнэ” тоглолт дээр монголын рок попын бараг бүх хамтлаг, дуучин ирж оролцоно.
Г.Пүрэвдоржийг манай үзэгч, сонсогчид “Улаанбаатарын үдэш”, “Нандин эрдэнэ”, “Мартъя”, “Зөвхөн тэр хайрандаа” зэрэг олон сайхан дуугаар нь андахгүй. Мөн Хөгжим бүжгийн коллежид олон жил багшилсан энэ эгэлгүй даруухан эрхэм олон шавьтай. Монголын рок поп урлагийг өдгөө нуруун дээрээ авч яваа гэж хэлж болох “Никитон”-ы Баачка, “Камертон” хамтлаг, Сэрчмаа нар түүний шавь гэдгээрээ бахархдаг юм билээ.
Г.Пүрэвдорж бол хөгжмийн зохиолчоор зогсохгүй шилдэг төгөлдөр хуурч, Монголын топ аранжировшик, омог бардам бахархах олон шавьтай хүн билээ. Ийм нэгэн эгэлгүй эрхмийн анхны уран бүтээлийн цэнгүүнд таныг урьж байна.
Г.Энхтуяа
