“Алтан хальс” холбоо зуны турш ҮСАХ-д долоо хоног бүр задгай кино театр ажиллуулсан бөгөөд энэ ням гаригт “The Royal Tenenbaums” киногоор хаалтаа хийх гэж байна.
Орчин цагийн шилдэг залуу найруулагчдын нэг Вес Андерсоны энэхүү бүтээл Тененбаумсынхны гэр бүлийг тойрон өрнөх үйл явдлуудыг хошин байдлаар харуулжээ.
“Алтан хальс”-ынхан тус бүтээлийг “Орчин цагт Америкт мандаж буй залуу найруулагч Вес Андерсоны тун хөгжилтэй аян. Аян гэж нэрлэсний учир нь кино театрт сууснаараа энэхүү өвөрмөц гэр бүлийн талаарх олон адал явдлын талаар мэдээд зогсохгүй киноны хийц маягийн шинэлэг ертөнцөөр аялна” хэмээн тайлбарлаж байна.
“Empire” сэтгүүлээс уг бүтээлийг түүхэн дэх 159 дэх гайхамшигт кино хэмээн зарласан бөгөөд гол дүрд Гвинет Пэлтроу, Оуэн Вилсон, Билл Муррэй, Бен Стиллер тэргүүтэй алдартай жүжигчин тоглосон юм.
