Их Чингис хааны мэндэлсний 850 жилийн ойд зориулан “Алтан ураг” бүжгэн жүжгийг энэ сарын 13, 14-нд тоглох гэж байна. Тус жүжиг анх 1996 оны долдугаар сарын 6-нд ҮДБЭЧ-ын тайзнаа нээлтээ хийж байжээ.
“Алтан ураг” бүжгэн жүжгийн цомнолыг Төрийн соёрхолт ардын уран зохиолч Б.Лхагвасүрэн, хөгжмийг Төрийн соёрхолт, УГЗ Б.Шарав, найруулагчаар Төрийн соёрхолт, УГЗ С.Сүхбаатар, ерөнхий зураачаар Ардын зураач, УГЗ Х.Гунгаасүх, ерөнхий удирдаачаар ҮДБЭЧ-ын уран сайхны удирдаач Н.Буянбаатар, хувцасны зураачаар ҮДБЭЧ-ын ерөнхий найруулагч Д.Ганболд ажиллаж байна.
Тус жүжгийг Их эзэн Чингис хааны түүхээс сэдэвлэж бүтээсэн түүхэн бүжгэн жүжиг юм. Жүжигт Тэмүүжин анд Жамуха, эцэг Тоорил хааны дэмжлэгтэйгээр Мэргэдэд булаалгасан Бөртэ хатнаа буцаан авч улмаар Их Монгол улсаа байгуулсныг хүртэлх үйл явдлыг бүжгэн жүжгээр илэрхийлэх юм. Гол дүр болох Тэмүүжингийн дүрд бүжиг дэглээч Х.Хашхүү, Жамухын дүрд СТА А.Даваахүү, Бөртэ хатны дүрд бүжигчин Н.Мөрөн, Тоорил хааны дүрд бүжигчин Д.Эрхбилгүүн, Хуагчины дүрд МУГЖ Ш.Одонтуяа, Хасарын дүрд бүжигчин Э.Уртнасан, Билгүүдэйд бүжигчин Э.Ганзориг, Дармаалаагийн дүрд СТА А.Батхүү нар тогложээ.
Тус жүжиг нь ардын бүжгэнд тулгуурлаж, бүжгэн жүжгийн үндсэн хэлбэрээр хийсэн хоёр дахь томоохон бүтээл юм.
