Өнөөдр 19.00 цагт УДЭТ-ын тайзнаа алдарт А.Аданы Жизель балетыг тоглох гэж байна. Хоёр бүлэгт тус балетыг анх Парижийн Гранд-Опера театрт тоглож байсан юм. Маргааш тоглох уг балетын гол дүрд МУГЖ балетчин Г.Цолмон, АНУ-ын алдарт бүжигчин Саша Радецки нар тоглох юм. Олон улсад нэр хүндтэй бүжигчин тоглож буй буй нь манай сонгодог урлагийн байгууллагыг ямар түвшинд явж байгааг илтгэж байгаа юм. “Жизель” балетын цомнолыг хуримлаж амжилгүй нас нөгчсөн охидын сүнсний тухай эрт урьдын домогоос сэдэвлэжээ.
Францын зохиолч, яруу найрагч, театрын шүүмжлэгч Т.Готье нэг удаа Г.Гейнегийн номыг уншиж суутал гайхалтай сайхан сэдэв санаа толгойд нь орж ирсэн гэнэ. Тэрбээр хожим Гейнед хандсан захидал маягаар бичсэн өгүүлэлдээ: “Эрхэм Гейне таны “Германы тухай” гэсэн гайхамшигтай сайхан номын хуудсыг эргүүлж суугаад Граце ба Рейн мөрний эрэг хавийн өтгөн манан, сарны гэрэл зэрэг үзэгдлүүд болон цагаан хувцастай эльфүүд, усны дагинас, бүжиглэх хүслэнд автсан виллисүүдийн /хуримынхаа өмнөхөн нас эцэслэсэн залуухан бүсгүйчүүлийн сүнснүүд/ талаар бичсэн сэтгэл догдлом хэсгүүдийг олж уншлаа. Тэгээд би үүгээр чинь хачин сайхан балет хийж болох юм байна гэж дуу алдсан билээ” гэжээ.
Жинхэнэ хайрын сэтгэл, өршөөл энэрэл, хүнлэг чанарыг дээдлэх үзэл шингэсэн энэхүү балетын уг санаа нь бүхий л цаг үед чухал байлаа. Тиймээс энэ балет хоёр зууны турш тайзнаа тоглогдсоор байна.
Романтизмын дүрүүдийн нэгэн адил уг жүжгийн гол дүрийн хувь заяа эмгэнэлтэйгээр төгсөх боловч үзэгчдийн сэтгэл гуниг гутралд авталгүй, бодол санаа нь ариусч, амьдралын сайн сайханд итгэх итгэл найдвараар гийгдэн гэгээрдэг билээ. Өргөн утгаар авч үзвэл өшөө хорсол нүүрлэсэн энэ ертөнцийг өршөөл энэрлээр аврах замыг бяцхан Жизель зааж өгөх мэт сэтгэгдэл төрүүлдэг. “Жизель” балетын үзэл санаа, мөнхийн чанар үүнд л оршиж буй юм.
А.Аданы хөгжим нь уг жүжгийн үйл явдал утга санаа, драматизмын чигийг тодорхойлж, дүрийн сэдэв аялгууг баяжуулан симфони хөгжмийн зарчмыг балетад нэвтрүүлэх эрмэлзэл бүхий анхны алхам байлаа.
