Хэрэв хэн нэгэн хотын гудамжаар танк унаад давхиж байвал гайхах юм огт үгүй. Тэр бол Арнольд байх болно хэмээн америкчууд хайртай жүжигчнээ “өхөөрдөж” байна. Холливудын од, басхүү гайгүй сайн улс төрч Арнольдын цуглуулганы хамгийн том нь түүний хувийн танк. Эр зориг, хүч чадлын бэлэг тэмдэг болсон түүнд танк байдаг гэдэгт гайхах хүн бараг үгүй биз ээ.
Арнольдын танк зүгээр нэг үзүүлэн биш. Жинхэнэ дайны зориулалтын маш хүчирхэг танк бөгөөд тэрээр танкаа өөрөө жолоодож чаддаг. “M47 Patton” хэмээх загварын энэ танк 1951-1953 онд бүтээгдсэн 50 тоннын жинтэй цэвэр гангаар хийгдсэн хүчирхэг эд. Бүр ч гайхалтай нь тэр энэ танкийг 18 настайдаа армид алба хааж байхдаа жолооддог байсан тухайгаа сэтгүүлчдэд хэлсэн юм. Тэрээр “Намайг цэргийн алба хааж байх үед ямар нэг дайн болоогүй учраас дайнд явж чадаагүй, хэрэв эх орноо хамгаалахаар дайнд явах шаардлага гарсан бол бэлэн байсан. Би дайнд бүх талаараа бэлтгэгдсэн байсан” хэмээн хэлжээ. Арнольд одоогийн цэргүүдийг хараад цэрэгт явахсан гэж боддогоо ч нуугаагүй гэнэ.
