Дэлгэцийн болон телевизийн шилдэг бүтээлийг шалгаруулдаг 70 дахь удаагийн “Алтан бөмбөрцөг” кино наадам энэ цаг мөчид Калифорни мужийн Беверли Хиллс дүүрэгт үргэлжилж байна. Орон нутгийн цагаар ням гаригийн үдэш эхэлсэн /Монголын цагаар өнөөдөр өглөө/ улаан хивсний ёслолд кино урлагийн шилдгүүд чуулжээ.
Энэ жилийн наадмыг жүжигчин Тина Фей, зохиолч Эми Полер нар хөтлөн явуулж буй юм. “Алтан бөмбөрцөг”-ийн нэр дэвшигчдийг нэг сарын өмнө өнгөрсөн арванхоёрдугаар сарын 13-нд Холливудын үзэсгэлэнт бүсгүйчүүд болох Жессика Альба, Меган Фокс болон “Шарталт” киноны од жүжигчин Эд Хелмс нар албан ёсоор олон нийтэд зарласан билээ.
Харин энэ цаг мөчид “Алтан бөмбөрцөг” наадмын шилдгүүд эхнээсээ тодорч, шагналаа гардсаар байна. Энэ жил 70 настай золгож буй тус наадмын анхны шагналтан нь жүжигчин Кристофер Волц боллоо. Тэрбээр найруулагч Квентиан Тарантиногийн бүтээл “Жанго чөлөөлөгдсөн нь” киноны харгис мөрдөгчийн дүрээр шилдэг туслах дүрийн шагналыг гардав. Энэ төрөлд жүжигчин Леонардо ди Каприо нэр дэвшсэн ч “харгис мөрдөгч”-ийг гүйцсэнгүй.
Харин телевизийн бүтээлийн шилдэг туслах дүрийн шагналыг Америкийн ITV-ийн “Downton Abbey” олон ангит киноны дүрийг бүтээсэн Мэгги Смит, “Эх орон” цувралын авилгач цэргийн дүрээр Дэмиан Льюс нар хүртжээ. Мөн “Эх орон” олон ангит кино нь “Алтан бөмбөрцөг”-ийн телевизийн шилдэг олон ангит драм төрөлд шилдгээр шалгарч, “Downton Abbey” , “Breaking Bad”, “Boardwalk Empire” болон “Редакци” цувралуудыг ардаа орхижээ.
Мөн “Халаасны хөзрүүд” телевизийн богино хэмжээний цуврал энэ төрөлд шилдгээр шалгарч, гол дүрийн жүжигчин Жулиан Мур дээрх төрөлд шагналын эзэн болсон байна. Жулиан Мур 2008 оны АНУ-ын ерөнхийлөгчийн сонгуульд дэд ерөнхийлөгчид нэр дэвшиж байсан улс төрч Сара Палины дүрд тоглосон юм.
Тайвань гаралтай найруулагч Ан Лигийн бүтээл “Пигийн амьдрал” кино шилдэг киноны хөгжим төрөлд “Алтан бөмбөрцөг” шагнал хүртлээ. Кино сонирхогчдын дунд таавар төрүүлсэн “Пигийн амьдрал” адал явдалт драмыг Ян Мартелын ижил нэрт романаас сэдэвлэн бүтээжээ.
Харин ээж болоод удаагүй Их Британийн дуучин Аделийн дуулсан “Skyfall” киноны дуу түүнд “Алтан бөмбөрцөг”-ийн шагнал авчирчээ.
“Алтан бөмбөрцөг”-ийн шилдэг найруулагчийн бүтээлд энэ удаа Стивен Спильбергийн “Линкольн”, Кэтрин Бигелоугийн “Zero Dark Thirty”, Бен Аффлекийн “Арго” нэртэй кинонууд дээгүүр давхиж байгаа аж. Ялангуяа АНУ-ын иргэний дайны сэдэвт “Линкольн” долоон төрөлд нэр дэвшээд байгаа юм.
Гол шагналын эзэд тун удахгүй тодорно.
