Монголын Уран зургийн галерейн санаачилгаар байгуулагдсан “Керамик арт” студи, 116 дугаар дунд сургуулийн сурагчидтай хамтран “Тэмтрэхүй” үзэсгэлэнгийн төслийг хэрэгжүүлсэн юм. Тус үзэсгэлэнгийн нээлт өнөөдөр 15.00 цагт Уран зургийн галерейд үзэсгэлэнгийн танхимд болно.
Харааны бэрхшээлтэй иргэдэд хүрэх үйлчилгээ тун хомс байдаг бөгөөд үнийн нэгд музей ордог. Үзэгчид музейн үзмэрт гар хүрч болохгүй гэсэн хориг аль ч музейд байдаг. Учир нь үзмэр нь ховор нандин, амархан гэмтэх онцлогтой байдаг. Тиймээс харааны бэрхшээлтэй иргэд музей үзэх боломжгүй юм. Тэдэнд музей үзэх адил тэгш боломж олгох, харааны бэрхшээлтэй хүүхдүүдийн дүрслэх урлагийн боловсролд хувь нэмэр оруулах, өөрсдийн гараар бүтээл туурвих, түүнийгээ үзэсгэлэнгийн хэлбэрээр бусадтай хуваалцах, олон нийтэд танилцуулахад энэ үзэсгэлэнгийн зорилго оршиж байна.
Төслийн хүрээнд сонгосон 116 дугаар дунд сургуулийн харааны бэрхшээлтэй 16 хүүхдүүдэд “Керамик арт” студийн мэргэжлийн багш нар керамикийн урлагийн үндсэн арга барилуудыг заан дадлагажуулж, хийсэн бүтээлийг нь пааландан эцсийн байдлаар урлагийн бүтээл болгон дэлгэхэд бэлэн болжээ.
Нээлттэй нийгэм хүрээлэн, Соросын сан, Cоёл урлагийн хөтөлбөр уг төслийг санхүүжүүлсэн байна. Тус үзэсгэлэн ирэх гуравдугаар сарын 15 хүртэл үргэлжлэх тул та бүхэн тухлан саатаарай. Уг үзэсгэлэн цаашид нүүдлийн үзэсгэлэн хэлбэрээр тусгай сургалттай болон ерөнхий боловсролын сургууль, музейгээр аялуулах гэнэ.
Та бүхнийг урлагийн тэнгэр ивээг…
www.URLAG.mn
