Ямар ч нөхцөлд, ямар ч хөг хэмнэлтэй хоршиж чаддаг джаз хөгжим аргагүй л дэлхий дахины хөгжим. 20-р зууны эхээр АНУ-ын Нью-Орлеансын хар арьстнуудын дунд үүссэн энэ гайхалтай хөгжмийн урсгал 1912 оны үеэс джаз хэмээн нэрлэгдэх болжээ. Чухам энэ л үеэс уг хөгжмийн урсгал дэлхий нийтэд тахал мэт тархсан. Жааз нь рок энд роль ритм ба блюз, ска, регги зэргийн эх болсон юм. Энэхүү уянгалаг зөөлөн аялгууны зохицол, сэтгэлийн таашаал мэдрүүлэх гайхалтай хөгжмийг олон орны уран бүтээлчид өөрсдийн хэв маягт нийцүүлэн өөрчилж, дэлхийн өнцөг булан бүрт хүргэсэн. Манай орны хувьд джаз тийм ч өргөн хүрээнд тархаагүй. Харин 2004 оноос “Их Талын Джаз” ТББ Монгол улсад джаз хөгжмийг түгээн дэлгэрүүлэх, залуу уран бүтээлч, хөгжимчдийн ур чадварыг дээшлүүлэх, гадаад улсын уран бүтээлчидтэй хамтран ажиллах, жааз хөгжмийн туршлага солилцоог бий болгох чиглэлээр үйл ажиллагаа явуулж эхэлжээ. Уг ТББ нь “Их Талын Джаз” фестивалийг тогтмол зохиодог юм. Тухайн фестиваль ОХУ, Швейцар, Их Британи, Герман, Канад, АНУ, Норвеги, Монгол зэрэг орны мэргэжлийн хамтлаг, хөгжимчид оролцдог байна. Мөн Монголын үзэгчдэд уран бүтээлээ танилцуулж, улс хоорондын урлагийн холбоог бэхжүүлэхэд хувь нэмрээ оруулсаар байгаа билээ. Амьд хөгжмийн “Ривер Саундз” клуб байгуулагдсан цагаасаа л хөгжмийн энэхүү урсгалыг дэмжиж, хамтлаг дуучдын тоглолтыг хийж ирсэн юм. Тус клуб “Их Талын Джаз” хөгжмийн наадмыг зохион байгуулахад жил бүр оролцож, долоо хоногийн турш джаз хөгжмийн гайхамшгаар үзэгчдийг аялуулдаг уламжлалтай. Мөн хамтлаг, дуучид нь фестивалийн хүрээнд СУИС, ХБК, хөгжим сонирхогч багш, оюутнуудад жааз хөгжмийн онол, дадлагын хичээл зааж үзүүлэх тоглолтыг хийдэг. Түүнчлэн “Лянхуа” өнчин хүүхдийн асрамжийн газарт тусгай урилгаар тоглодог нь уламжлал болон тогтсон байдаг.
"Их тал жазз" ТББ нь гадны нэр хүндтэй мэргэжлийн жазз тоглоочидтой хамтран тоглох, хөгжмийн төсөл хэрэгжүүлэх зорилгоор 2012 оны 11 сарын 14-д "Giant Jazz" хамтлаг байгуулсан нь монголын жазз хөгжмийн урлагт нэгэн чухал үйл явдал боллоо. Уг хамтлаг нь монголдоо мэргэжлийн жазз урлагийг түгээн дэлгэрүүлэхээс гадна "Их тал жазз" ТББ -ын урилгаар ирж буй гадны зочин уран бүтээлчидтэй хамтран тоглох, монголын жазз урлагийг дэлхий дахинд таниулах, жазз хөгжмийн талаарх хүүхэд залуучуудын хөгжмийн боловсролыг хөгжүүлэх зорилготой юм. Хэрэв та джазыг мэдрэхийг хүсвэл аялгуу хэмнэл бүрийг салгаж сонсох нь чухал. Тэгэх аваас энэ хөгжмийг ойлгож, жинхэнэ сэтгэлийн таашаал, тайтгарлыг мэдрэх болно.
Mongolian professional jazz band "Giant Jazz"
Та бүхнийг урлагийн тэнгэр ивээг…
www.URLAG.mn
