Саяхан Нью-Йоркийн загварын долоо хоногийг өөрийн загвараар нээсэн Катя Зол, стилист Д.Энхмаа, нүүр хувиргагч Э.Эрдэнэсувд нар уран бүтээлээ монголчууддаа тайлагнахаар “The Smooth White” шоу зохиосон билээ. Шоуны үеэр үзэгчид алга ташилтын хурыг харамгүй буулгаж, Катя Зол баярын нулимсаа барьж ядан ёсолсон. Уг шоуны бас нэгэн эзэн болох Д.Энхмаагийн “Хатад” коллекцийг амилуулахаар “Киви” хамтлагийн дуучин Ука тайзнаа гарч ирсэн нь үзэгчдийг алмайруулж, жинхэнэ сюрприз болж чадлаа. Тэрбээр хар өнгийн титэм, нүдний торон хаалт, гоёмсог даашинзаар гоёжээ. Ука тайзны хатан хаан гэдгээ нотолж, нууцлаг атлаа эрхэмсэг, эрч хүчээр дүүрэн алхалж, тэнд цугласан хүмүүсийг хэдэн хором ховстох шиг болсон. Стилист, загвар зохион бүтээгч Д.Энхмаагаас коллекцийнх нь талаар лавлахад “Хар, улаан өнгөгүйгээр эмэгтэй хүний амьдралыг төсөөлж болохгүй учраас даашинзуудаа ийм өнгөөр урласан. Эмэгтэй хүн энэ амьдралдаа зоригтой, эрч хүчтэй, хатан хаан шиг л байх ёстой. Эмэгтэйчүүдийн дотоод мөн чанарыг нууя гэсэн утгаар нүдэнд нь хаалт хийсэн. Бүсгүй хүн нууцлаг байх тусмаа үнэ цэнэтэй байдаг” гэлээ.
Катя Золтой цөөн хором ярилцсанаа хүргэе.
-Нью-Йоркийн загварын долоо хоногт амжилттай оролцсонд баяр хүргэе. Таны загварууд үнэхээр дэгжин, хээнцэр юм. Загварын нэр хүндтэй шүүмжлэгч, мэргэжилтнүүдээс ямар үнэлгээ авсан бэ?
-Монголын загварын төлөөлөл болоод ирсэндээ баяртай байна. Энэ зөвхөн эхлэл учраас цаашдаа олон зүйл хийхээр төлөвлөж байгаа. Тэд “Монголын загвар зохион бүтээгч цаг үетэйгээ хөл нийлүүлэн алхаж байна, материалын сонголт үнэхээр зөв болжээ. Хийц сайтай юм” гэж магтсан. Ер нь магтаалын үг их сонссон, бүгд ам сайтай байсан. Миний загварууд эмэгтэй хүний эрхэмсэг бардам төрхийг илүү тодотгож өгдөг.
-Танд ямар нэгэн санал ирсэн үү. Цаашид юу хийхээр төлөвлөж байна вэ?
-Европын болон, есөн сард болох дараагийн Нью-Йоркийн загварын долоо хоногт оролцох урилга ирсэн. Мөн Хонконгийн телевизээс 25 мянган ам.долларын шагналтай, загвар зохион бүтээгчийн тэмцээнд оролцох хүсэлт тавьсан.
-Манай загварын хөгжил ямар шатанд явж байна гэж дүгнэж байна вэ?
-Манайхан хаана ч дутахааргүй юм билээ. Үндэсний онцлог гаргасан нүүр будалт, үс засалтаараа ялгарсан. Гол нь бид түүхээ судалж байгаад үндэснийхээ онцлогийг загвартаа шингээх ёстойг сайн ойлгосон.
-“Киви” хамтлагийн Укатай хамтран загварын салон нээсэн гэсэн үү?
-“UK fashion house” загварын салоноо нээж, үйл ажиллагаа явуулаад хагас жил болж байгаа ч албан ёсоор байртай болж амжаагүй л явна. “Киви”, “Anemonе” хамтлагийн хэд хэдэн клипний хувцаслалт, нүүр будалт дээр ажилласан.
Б.Дөлгөөн
