Олон улсын улаан загалмайн өдөр өнөөдөр тохиож байна. Энэ өдрийг манай улс 2011 оноос “Хүмүүнлэгийн өдөр” болгон тэмдэглэж иржээ.Монголын улаан загалмайн нийгэмлэгээс “Хүмүүнлэгийн өдөр”-ийг угтаж нийгмийн сайн сайхны төлөө үйл бүтээсэн хүмүүсийг нигүүлсэнгүй үйлстэнээр тодруулсан байна.
Мөн Хэвлэлийн эрх чөлөөний өдрийг тохиолдуулан сэтгүүлч, зохиолчдыг “Нигүүлсэл” алт, мөнгөн медалиар шагнаснаа дуулгав. Тодруулбал, “Нигүүлсэл” мөнгөн медалиар зохиолч А.Байгальмаа, Монголын радиогийн сэтгүүлч Б.Төгсжаргал, “Сонгодог гэр бүл” сэтгүүлийн сэтгүүлч Б.Даариймаа, “Гэр бүл” радиогийн сэтгүүлч Г.Сонинбаяр, “Зууны мэдээ” сонины сэтгүүлч Д.Мягмар нарын хүмүүсийг шагнажээ. Түүнчлэн “Энэрэл” алтан медалийн эзнээр Монголын радиогийн сэтгүүлч н.Дугарсүрэн тодорчээ.
Саяхан Гавьяатын алдраар энгэрээ мялаасан яруу найрагч Үржингийн Хүрэлбаатар 300 гаруй дууны шүлэг зохиосон байдаг. Түүний дуу зөвхөн зохиолын дуучид төдийгүй эстрад, поп чиглэлийн дуучдын хувьд ч сүлд дуулал болж, тэднийг олонд таниулах гүүр болсон нь цөөнгүй. Түүний бүтээлүүд дунд МУЗН-ийн сүлд дуу "Хүмүүнлэгийн дуулал" хэмээх сайхан дуу бас бий. Энэхүү "Хүмүүнлэгийн дуулал" –ыг зохиосон гавьяаг нь үнэлэн өнөөдөр МУЗН-ээс түүнийг "Нигүүлсэнгүй үйлстэн"-ээр өргөмжилж, очир алмаазан шигтгээ бүхий "Нигүүлсэл алтан медаль"-аар шагнаж батламж олгожээ.
Хүмүүнлэгийн өдрийн хүрээнд өнөөдөр 11.15 цагийн хооронд орон даяар сайн дурын идэвхтэн гишүүд, дэмжигчид нээлттэй арга хэмжээ зохион байгуулахаар төлөвлөсөн гэдгээ Монголын Улаан загалмайн нийгэмлэгийн ерөнхий нарийн бичгийн дарга Самдандорж, Олон улсын Улаан хавирган сар нийгэмлэгийн Монгол дахь төлөөлөгч Тор Даниелсон нар дуулгасан юм.
www.URLAG.mn
