"Universe Best Songs 2011″ наадамд хэвлүүхэн хоолойтой “танхил” охин Архангай аймгаас хүрэлцэн ирж оролцоод улмаар шилдэг 25-ын нэгээр шалгаран үлдэж байсан цаг саяхан. Монголын рок попын ертөнцөд урьд хожид сонсогдоогүй өвөрмөц хоолойтой түүнийг тус наадмын Ерөнхий шүүгч, Пентатоник академийн ерөнхийлөгч ноён Б.Долгион овоо хараандаа авч, уран бүтээлийн гэрээ хийсэн юм.
DOLY’s продакшн хоёр жил гаруйн хугацаанд дуучин А.Хишигдалайг продьюсерлож хэд хэдэн дуу, клип гаргасан нь үзэгчдийн таашаалд нийцэж, залуухан охиныг одоо танихгүй, мэдэхгүй хүн ховор болоод буй.
Тэгвэл саяхан MIXX, Extacy зэрэг хамтлагуудыг продьюсерлож олны танил болгосон “Royal music” продакшныхан түүний ховор авъяас, хүчирхэг хоолойг “услах”-аар шийдэж 200 сая төгрөгийн уран бүтээлийн гэрээ хийх санал тавьжээ. Дөнгөж урлагийн ертөнцөд хөл тавьж байгаа залуу бүсгүй энэ ховор боломжийг алдахыг хүсээгүй бөгөөд DOLY’s продакшнаас өрх тусгаарлан эрч хүчтэй, залуу хамт олонтой нэгджээ. Тэд тун удахгүй орчин цагийн залуучуудад зориулсан цоглог хэмнэл бүхий клубын дуунуудаараа сонсогчдын сонорыг мялаах гэнэ.
Эх сурвалж: www.GREATNEWS.mn
