МЗЭ-ийн дэргэдэх Залуу зохиолчдын нэгдэлээс санаачлан зургаадугаар сарын 30-нд “Үндэсний цэцэрлэгт хүрээлэн”-д “100 яруу найрагч 100 хайрын шүлэг” утга зохиолын өдөрлөгийг амжилттай зохион байгуулсан билээ. Энэхүү уншлага, өдөрлөгийг санаачилсан залуус яруу найрагч О.Дашбалбар агсаны “Амьддаа бие биеэ хайрла” шүлгийн “Өргөн хорвоод хүн хайраар дутаж болохгүй” хэмээх мөрийг уриа болгосон байсан. Харин алдарт найрагчийн энэ шүлгэнд хөгжмийн зохиолч Соёлын тэргүүний ажилтан Б.Алтанхуяг аялгуу хийж дуу болгосныг энэ үеэр “Uvertura” дуулж, хуран цугларсан олны сонорт хүргэсэн юм. Энэхүү шүлгийг дуу болгохыг О.Дашбалбар агсаны охин Д.Индра санаачилсан бөгөөд “Аялгуу сайтай, маш сайхан дуу болжээ” гэсэн дүгнэлтийг үзэгч сонсогчдийн зүгээс өгч байлаа.
Уран бүтээлийн тоонд бус чанарт анхаардаг “Uvertura” хамтлагийн хоёр дахь цомгийн эхлэл болсон Монголын сонгодог бүтээлийн нэг “Амьддаа бие биеэ хайрла” дуунд “Анир” студийн захирал Б.Алтанхуяг ая хийсэн байна. Уг бүтээлийн бичлэгийг энэ оны өмнөхөн эхэлсэн бөгөөд чамгүй цаг хугацааны дараа ийнхүү бэлэн болж байгаа нь энэ ажээ. Энэ дуугаараа “Uvertura” хамтлагийнхан шинэ имидж бүрдүүлэлт хийж байгаа. Өөрөөр хэлбэл поп опера хамтлаг анхны рок опера бүтээлээ туурвиж байгаа нь энэ юм. Үүгээр ч зогсохгүй “Uvertura” хамтлагийнхан этник опера чиглэлээр дараагийнхаа уран бүтээлийг туурвиж эхлээд байгаа гэнэ.
“Амьддаа бие биеээ хайрла” дууны хувьд тун удахгүй клип болон үзэгчдэд хүрэх юм. Тодруулбал клипний зураг авалтад ороод байгаа бөгөөд энэхүү сонгодог бүтээлийн дүрсжүүлэлтийг тус хамтлагийн “Өнө мөнх орон“, “Цагийн аяс” зэрэг бүтээлийг хийсэн “MILL” студийнхэн хийж байгаа ажээ.
www.URLAG.mn
