20-р зууны Манлай хос дуучин гэхээр МУГЖ С.Вандан Д.Дуламсүрэн нар хэний ч санаанд шууд бууна. Хос дээл, хос бүрх малгай, хос ятга. Энэ бол МУГЖ С.Вандан, Д.Дуламсүрэн нарын давтагдашгүй бас хуучрашгүй имиж. Тэдний дуулсан дуу бүрийг 1980-аад оны залуус амандаа аялдаг байсан нь саяхан.
Харин сүүлийн үед залуус Тулганы галаа хамтдаа ноцоож, Тооноо өргөсөн ижил заяа, Томоогүй алдааг минь уучилж хайрласан, Тэнгэрлэг хань минь чамдаа хайртай… хэмээн аялах болж. 30 гаруй жил ханилан нэг биеийн хоёр тал болсон хос дуучид маань өөрсдийн амьдралын түүхийг өгүүлсэн “Ижил заяа” дуу гарган тэрхүү дуугаа өөрсдийн идэр залуу насныхаа гэрэл зургуудаар дүрсжүүлж хийсэн нь олны таалалд нийцэж, ийнхүү хит болсон.
Хос ятгаа барин цангинатал хамтран дуулах тэдний хослон дуулах рекордыг өнөөдөр хэн ч эвдээгүй байна. 80-аад оны “супер” одууд өнөөдөр ч жавхаатай, золбоотой, өнгөлөг хэвээр. Ижилдэн дассан ижил заяа гэж үүнийг л хэлэх байх.
Эх сурвалж: www.aravt.mn
