Хайрыхаа төлөө тэмцээч гэж хажуудах найз минь зэмлэх юм
Хайртай л юм бол өөрийн болго гэж хатуу үг шивнэх юм
Хариугүй нялцгай амьтан биш, би түүнийг харахгүй амьдарч чадна
Хайргүй гэдгийг нь мэдсээр байж харин хамт байж чадахгүй
Яахавдээ би дурласан нь үнэн хүнийх болсон хүний үрд
Яагаачгүй байсан олон зүрхийг шархлуулж явсан үйлийн үрд
Ямархан бол гэж сонирхож явсан дурлал гэгчтэй нь би учраад
Яруу сайханыг нь бус гунигийг нь бас шаналалыг нь амсах заяатай байж
Ганган хээнцэр охидоор зугаацах саваагүй залуу байсан бол
Ганцхан удаа өвөрт чинь хэвтэхийг санаархаж нэг үзэх байсан
Гал шиг халуун хайранд чинь эзэн гэж байгаагүй бол
Гарцаагүй чамайг өөрийн болгоод жарган цэнгэн суух байсан
Чи минь гэтэл үнэн зүрхнээсээ нэг л хүнрүү тэмүүлж
Чамайг гэх хайраас минь ч илүүгээр тэр бүсгүйг хайрлах юм
Чиний өмнө дур булаам ч нүд чинь намайг харахгүй
Чихэнд чинь хайрын үг шивнэсэн ч чи сонсохгүй
Ихэмсэг бардам бүсгүй би тэгэж явахыг хүсэхгүй
Ингээд бүхнийг мартаад хайраа олсон чамайг орхие
Хүнийх болсон хүний үрд дурласан заяандаа гомдож
Чинийх болсон зүрхээ би жаргал дор чинь дэвсэе
Б.Зул
