Соёл Спорт Аялал Жуулчлалын Яам, түүний харъяа Соёлын Өвийн Төв, “Хүннү цуурчдын холбоо” ТББ хамтран зохион байгуулж байгаа “Цуурын уламжлалт урлагийн өнөөгийн байдал, тулгамдсан асуудлууд” эрдэм шинжилгээний хурал 8-р сарын 14-ний 10 цагаас Хүүхдийн номын ордоны Швейцарийн танхимд эхэлнэ. Хуралд цуурч, судлаач эрдэмтдийн монгол цуур хөгжмийн домог уламжлал, хийц бүтэц, өнөөгийн байдал, бусад урлагтай харилцан шүтэлцэх нь, мэргэжлийн сургалтанд хэрхэн ашиглах тухай зэрэг 10 гаруй илтгэл тавигдах юм байна. Мөн “Монгол цуур” үндэсний хөтөлбөрийн төслийн хэлэлцүүлэг явагдах юм.
Цуур хөгжим нь Монголчуудын утга соёлын ховор хосгүй өвийн нэг төдийгүй ЮНЕСКО-гийн “Яаралтай хамгаалах шаардлагатай Соёлын Биет бус өвийн жагсаалт”-д орсон билээ. Гэвч Монголчуудын нүүдлийн соёлоор дамжин үеэс үед өвлөгдсөөр ирсэн энэхүү өв нь эзэн хүнтэйгээ хамт алга болж, устаж мартагдах аюул тулгараад байгаа Соёлын Биет Бус Өвийн төрөл зүйлийн нэг юм.
Баруун монголын Урианхай ястаны цуурдах уламжлалыг өвлөсөн сүүлчийн гарамгай төлөөлөгч Ховд аймгийн Дуут сумын харъяат Паарайн Наранцогт агсаны амьд ахуйдаа зааж сургасан нутгийн зарим авъяастан, түүний хүүхдүүд, ач, зээ нар болон цуурдах эрдмийг шимтэн сонирхсон цөөн тооны авъяастнууд энэхүү ховор нандин урлагийг аварч үлдэх итгэл найдвар болж үлдээд байна.
2006 онд алдарт цуурч П.Наранцогтын удмын цуурчид, судлаач эрдэмтдийн санаачлагаар ирээдүйн цуурчдыг бэлтгэх анхан шатны сургалтыг Улаанбаатар хот болон Баян-Өлгий, Ховд, Орхон аймгуудад явуулж, 50 гаруй залуу цуурчид амжилттай суралцан төгсчээ. Мөн цуур хөгжмийг СУИС болон Хөгжим бүжгийн коллежийн оюутнуудад сонгон суралцах хэлбэрээр заах эхлэл тавигдаж байна.
Цаашид хүн төрөлхтний ховор хосгүй өвийн зэрэглэлд багтсан Соёлын Биет бус өвийн энэ төрөл зүйлийг хамгаалах, судлах, сурталчлах, хойч үед сурган өвлүүлэх замаар оршин тогтнох, амьдарч хөгжих чадварыг хангах нь тулгамдсан зорилт болж байна.
Энэ ажлын хүрээнд “Цуурын уламжлалт урлагийн өнөөгийн байдал, тулгамдсан асуудлууд” эрдэм шинжилгээний энэхүү хурлыг Соёл Спорт Аялал Жуулчлалын Яам, түүний харъяа Соёлын Өвийн Төв, “Хүннү цуурчдын холбоо” ТББ хамтран зохион байгуулж байна.
Хуралд цуурч, судлаач эрдэмтдийн монгол цуур хөгжмийн домог уламжлал, хийц бүтэц, өнөөгийн байдал, бусад урлагтай харилцан шүтэлцэх нь, мэргэжлийн сургалтанд хэрхэн ашиглах тухай зэрэг 10 гаруй илтгэл тавигдах болно. Мөн “Монгол цуур” үндэсний хөтөлбөрийн төслийн хэлэлцүүлэг явагдах юм.
www.URLAG.mn
