“Урбан Номадс” төслийн хамт олон улаанбаатарчуудад тун удахгүй цуврал төслөө дэлгэх нь ээ. Урлагийн олон төрлөөр дамжуулан таван сэдвээр таван долоо хоног үргэлжлэх уг төслийг ХБНГУ-д төвтэй “Урбан Номадс” төслийн хамт олон танилцуулахад бэлэн болжээ.
Урбан Номадс “Crossing Identities“ буюу эрхлэгчид, мэргэжилтнүүд, сонирхогчдын төсөл нь ХБНГУ-ын Гадаад харилцааны яамны дэмжлэгтэйгээр Монгол-Германы хооронд дипломат харилцаа үүссэний 40 жилийн ойд зориулсан соёлын арга хэмжээний нэгээхэн хэсэг юм. Үүнд Монгол, Германы болон олон улсын уран бүтээлчид, философичид, монгол хэл судлаачид, хот төлөвлөгчид болон соёл урлаг судлаачид оролцох бөгөөд тэд таван баг болон хуваагдаж, хотжилтын үеийн нийгмийн бодит байдал, тулгамдсан асуудлуудыг дүгнэн шинжиж хэлэлцэх юм.
Мөн түүнчлэн СУИС-ийн болон МУИС-ийн герман хэл судлалын ангийн нийт 50 гаруй оюутан, 24 гадаадаас уригдан ирж байгаа багш, оюутан, уран бүтээлчид, хотын ард иргэдтэй хамтран анх удаа хотын гудамж талбайд, сэдэвчилсэн үзүүлэн тоглолт хийж түүнтэй холбоотой ярилцлага, арга хэмжээнүүдийг зохион байгуулах юм.
Эдгээр таван баг нь ирэх есдүгээр сард өнөөгийн их хотын нүүдэлчдийн талаарх судалгаа хийж, ярилцаж, шинэ мэдээлэл мэдлэгийн талаар сургалт зохион явуулах юм. Ийнхүү олж авсан мэдлэг мэдээлэл дээрээ тулгуурлан тухайн орны уран бүтээлчид болон ард иргэдтэй хамтран “Урбан Номадс” “Community Art & Development Project”-ийг хэрэгжүүлэх бөгөөд энэ нь орчин цагийн нүүдэлчдийн мөн чанар, хувь хүний хөгжил, монголын соёлын өвийн олон асуудлууд, хотын хөгжил болон байгаль орчны хамгаалалтад иргэдийн зайлшгүй оролцоо, хотын захын гэр хороолол буюу нийгмийн харилцаа, хангамжаас гадуурхагдан үлдсэн давхрагийнхний нийгмийн асуудал зэргийг хөндөн, урлагийн төрөл бүрийн хэлбэрээр илэрхийлэн үзүүлэх юм. Үүнд маш өргөн хэмжээгээр ард иргэдийг татан оролцуулж, улс төр, уран сайхны чөлөөт индэрийг бий болгох аж. Монголын уран бүтээлчид, судлаачид, оюутнууд нь энэхүү төслөөр дамжуулан нүүдэлчдийн ахуй амьдралын олон зуун жилийн түүхтэй туршлагийг орчин цагийн Германы болон олон улсын соёлын хөгжил ба түүний томъёлолын асуудалд харицуулан жиших боломжийг олгож, нөхцөлийг бүрдүүлэх нь ээ. Мөн түүнчлэн “Урбан Номадс”-ын соёл урлаг, боловсролыг дэмжих төсөл нь нийгэм, улс төр, эдийн засгийн тулгамдсан асуудлуудийг урлагийн үзүүлбэрийн хэлбэрээр, ард иргэдийн оролцоотойгоор илэрхийлэн үзүүлэхийг зорьж байгаа аж.
www.URLAG.mn
