Энэтхэгийн өмнөд хэсэгт орших Тамил Наду мужийн их сургуулийн лабораторид судлаачид 2500 жилийн өмнө амьдарч байсан хүний шүднээс тухайн үеийн хүний төрхийг бүтээх сонирхолтой судалгааны ажлыг хийж байна.
Судлаачид Энэтхэгийн археологийн дурсгал олонтой Килади хотоос урагш дөрвөн км зайд орших Кондагай хэмээх эртний оршуулгын газраас хоёр эрэгтэй хүний гавлын ясыг малтаж гаргасан байна. Мадурай Камаражийн их сургуулийн судлаачид тухайн хүмүүс нь МЭӨ 580 жилийн өмнө амьдарч байсан хэмээн тогтоосон бөгөөд нэгийнх нь шүдний бүтцийг ашиглан тухайн үед амьдарч байсан эртний хүмүүсийн нүүр царайг дижитал аргаар сэргээн босгосон зургийг нийтэд танилцуулжээ.
2500 жилийн настай гавлын ясны нүүр царайг сэргээн засварлах туршилтыг хйж буй эрдэмтдийн нэг, профессор Кумаресан “Энэхүү сэргээн босгосон царайг харахад Энэтхэгийн хойгийн анхны оршин суугчид болох эртний өвөг дээдэс, индианчуудын төрхтэй ихээхэн төстэй байна” хэмээн ярьжээ. Гэхдээ Киладигийн оршин суугчдын өвөг дээдсийг зөв тогтоохын тулд илүү их судалгаа хийх шаардлагатай гэж профессор Кумаресан нэмж хэлжээ.
Мадурай Камаражийн их сургуулийн судлаачид гавлын ясны 3D сканнерыг бүтээснээр гавлын ясны нүүр царайг сэргээн засварлах ажил эхэлсэн байна. Эхний судалгаа дуусмагц дижитал сканнеруудыг Их Британийн Жон Муресын их сургуулийн Face Lab руу илгээжээ. Face Lab нь шүүх эмнэлэг, урлаг, шинжлэх ухааны зарчим, технологийг ашиглан гавлын нүүрний дижитал сэргээн босголтыг бүтээх чиглэлээр мэргэшсэн лаборатори юм.
Лабораторийн мэргэжилтнүүд компьютерийн программ хангамжийг ашиглан гавлын ясны сканнер дээр булчин, мах, арьсыг нэмж, нүүрний онцлогийг харуулсан бусад нэмэлт зүйлсийг бүтээжээ.
Одоогийн Энэтхэгийн хойд болон төв хэсэгт 5000 гаруй жилийн өмнө үүссэн Индусын хөндийн соёл иргэншил нь тус улсын анхны томоохон соёл иргэншил хэмээн үздэг. Харин Тамил Маду мужийн археологичид Киладигаас олдсон олдворууд нь Энэтхэгийн өмнөд хэсэгт ч эртний бие даасан соёл иргэншил байсныг анх удаа харуулж байна гэж мэдэгджээ.
Тэдний үзэж байгаагаар Киладигийн хүмүүс нь бичиг үсэгт тайлагдсан, өндөр ур чадвартай, улс дамнан худалдаа эрхэлдэг байжээ. Тэд тоосгон байшинд амьдардаг байсан бөгөөд өөд болоочдоо оршуулахдаа өдөр тутмын хэрэгцээт хүнсний үр тариа, тогоо зэрэг хэрэгслийг хамт оршуулдаг байсан хэмээн үзэж байна.
