Уран бүтээлч Э.Лхагвадорж бие даасан зургаа дахь үзэсгэлэнгээ “Лхам” арт галерейд дэлгэлээ. Энэ удаагийн үзэсгэлэнгээ “Мөнх хөх тэнгэр өвөл хаачдаг вэ” хэмээн нэрлэсэн бөгөөд эл үзэсгэлэн өвөл бүр дахин сөхөгддөг бодит байдлын тухай өгүүлж буй аж. Тодруулбал, улирлын настай асуудлууд, хувьсан өөрчлөгдөж буй бидний үнэ цэн, амьдрах биш тэмцэх болсон бодит байдлыг уран бүтээлээрээ дамжуулан харуулж буй юм. Магадгүй жилийн хамгийн догдлом өдрүүдийн нэг, баяр алгасан баяраар зочлох энэ үед цааш хэр удаан үргэлжлэх нь мэдэгдэхгүй энэ асуудалд бид ямар өөрчлөлтийг авчрах хэрэгтэй асуултыг үзэгчдэд үлдээх зорилгоор эл үзэсгэлэнг нээсэн аж. “Мөнх хөх тэнгэр өвөл хаачдаг вэ” үзэсгэлэн энэ оныг дуустал үргэлжилнэ.
