Монголын их шүтээн Их Монгол Улсын далай их Чингис хаан, Өгөөдэй хаан, Хубилай хаадын судалгааг үеийн үед дэлгэрүүлэн судалж олон нийтэд таниулах нь Монгол улсын иргэн бүр, түүний дундаас уран бүтээлчид, судлаачдын хувьд туйлын хүндтэй бөгөөд бахархал билээ.
Энэхүү бахархлыг түгээн дэлгэрүүлэх таниулах зорилготой “Хаан” хөрөг бүтээлийн үзэсгэлэнг өнгөрсөн бямба гараг /2025.02.22/-аас эхлэн “Чингис хаан” музейн нэгдүгээр давхрын үзэсгэлэнгийн танхимд олон нийтэд дэлгэлээ.
Үзэсгэлэнд Монголын эзэнт гүрний түүхэн сурвалж, зохиол бүтээлийг судлан, Тайванийн Тайпэй хотын үндэсний музейд хадгалагдаж буй Их Монгол Улсын гурван үеийн Чингис, Өгөөдэй, Хубилай гурван их хаадын эш хөрөг (Юань гүрний ордны Монгол зураач Хорихусун), Юань гүрний ордны зураач Лю Гуандаогийн “Хубилай хаан авд мордсон нь” бүтээл, Төрийн шагналт, Ардын зураач Ү.Ядамсүрэнгийн “Чингис хаан”, “Өвгөн хуурч” зэрэг түүхэн бүтээлүүдийг үндэслэн судалж, Монголын урчуудын эвлэлийн нэрэмжит шагналт, зураач Т.Одон, Монголын урчуудын эвлэлийн гишүүн, зураач А.Ууганбаяр, уран барималч Ж.Түмэнчулуун нар өөрийн оюун санаа, дүрслэл, зохиомжийг боловсруулан уран зураг, уран баримлаар хаадын дүрийг бүтээж, олон нийтэд хүргэж байна.
Үзэсгэлэнгээс нийт 20 гаруй уран бүтээлийг үзэж сонирхохоос гадна Их хаадын дүрүүдийн төрх, зан байдлыг урлагийн бүтээлээр хэрхэн илэрхийлснийг үзэх боломжтой.
