УДБЭТ-ын үндэсний шилдэг уран бүтээлүүдийн нэг, 1973 оны арванхоёрдугаар сарын 30-ны өдөр театрын тайзнаа анхлан тоглож байсан Төрийн шагналт, Ардын жүжигчин Жамъянгийн Чулууны “Уран Хас” бүжгэн жүжгийн пянзны нээлтийн үйл ажиллагаа өчигдөр /2025.04.13/ УДБЭТ-т боллоо.
“Уран Хас” бүжгэн жүжиг бол монголчуудын сэтгэлд мөнхөд эгшиглэх үндэсний сонгодог бүтээлийн оргил билээ. “Уран Хас” бүжгэн жүжгийн удиртгал хэсэгт вальс, буга согооны бүжиг гээд суут хүмүүний туурвилаас сонсож хоногшсон аялгуу олон бий. Энэхүү алдарт бүжгэн жүжгийг өнгөрөгч сард Улсын дуурь, бүжгийн эрдмийн театрын тайзнаа тоглосон юм. Уг тоглолтын үеэр “Чулуун” сангийн тэргүүн, Ардын жүжигчин удирдаач Чулууны Чинбат “Уран Хас” бүжгэн жүжгийн пянзны дээжээс театрын хамт олонд гардуулан өгсөн юм.
Пянзны нээлтийн ажиллагааны үеэр УДБЭТ-ын симфони найрал хөгжимчид, балетын жүжигчид, гоцлол дуучид оролцож, “Уран Хас” бүжгэн жүжгийн хөгжим, балетын хэсгээс тоглож, нээлтэд ирсэн зочид төлөөлөгчдөд толилууллаа.
