Монголын байгалийн гэрэл зурагчдын нийгэмлэгээс “Монголын байгалийн шилдэг гэрэл зураг-2026” олон улсын уралдааныг тав дахь жилдээ зохион байгуулах гэж байна.
Монголын Байгалийн Гэрэл Зурагчдын Нийгэмлэг нь 2020 оны аравдугаар сард байгуулагдсан бөгөөд Монголд байгалийн гэрэл зургийг хөгжүүлэх, гэрэл зургаар дамжуулан Монголын үзэсгэлэнт байгаль соёл урлаг, түүх дурсгал, өв уламжлалыг олон нийтэд түгээн сурталчлах, гэрэл зурагчдын ур чадварыг дээшлүүлэх чиглэлээр үйл ажиллагаагаа явуулдаг. Энэхүү зорилгынхоо хүрээнд Ерөнхийлөгчийн Тамгын газар, Гадаад харилцааны яам, Байгаль орчин, уур амьсгалын өөрчлөлтийн яам, Соёл, спорт, аялал жуулчлал, залуучуудын яамтай хамтран “Монголын байгалийн шилдэг гэрэл зураг” олон улсын уралдааныг Монгол Улсын Ерөнхийлөгчийн ивээл дор 5 дахь жилдээ зохион байгуулна.
Монгол Улс олон улсын чанартай уралдааныг зохион байгуулснаараа Монголыг зорих гадаадын гэрэл зурагчдын тоог нэмэгдүүлэх, дотоодын зурагчдын бүтээлийг олон улсад сурталчлан таниулах, аялал жуулчлалын урсгалыг татах, байгалийн үзэсгэлэн болон ахуй соёлын онцлогоо таниулан сурталчлах зэрэг олон талын ач холбогдолтой. Тиймээс цаашид ч шилдэг гэрэл зургийн уралдааныг жил бүр уламжлал болгон зохион байгуулахаар төлөвлөж байна.
Өмнөх жилүүдийн уралдаанд ирсэн бүтээлүүд бүгд өөр өөрийн онцлог бүхий Монгол орны байгалийн гоо үзэсгэлэнг тал бүрээс нь харуулсан бүтээлүүд байсан бөгөөд энэ жилийн уралдааны бүтээлүүдийг 2026 оны аравдугаар сарын 15-ныг хүртэл хүлээн авна. Уран бүтээлчид Монгол Улсад 2025, 2026 онд авсан бүтээлүүдээрээ ахуй, байгаль, зэрлэг амьтан зэрэг төрлөөр оролцох боломжтой юм.
- Уралдааны нийт шагналын сан 50,000,000 төгрөг,
- Уралдааны бүтээлүүдийг www.photoawards.mn сайтаар хүлээн авна.
Олон улсын шүүгчдийн бүрэлдэхүүнтэй тус уралдааны шилдгүүд 2026 оны арваннэгдүгээр сард тодрох бөгөөд шилдэг бүтээлүүдийн үзэсгэлэн, каталоги гарч, уралдааны ивээн тэтгэгч байгууллагууд шагналаа гардуулна.
