Нийслэлийн иргэдийн соёл урлагийн боловсролыг дэмжих, үндэсний дүрслэх урлагийн өв уламжлал, орчин үеийн бүтээлч сэтгэлгээг олон нийтэд сурталчлан таниулах зорилгоор мэргэжлийн уран бүтээлчдийн “Орд” үзэсгэлэнг тавдугаар сарын 7-нд дэлгэх гэж байна.
Тус үзэсгэлэнг Нийслэлийн иргэдийн төлөөлөгчдийн хурлын төлөөлөгч Б.Ану-Үжин санаачилсан бөгөөд ерөнхий зохион байгуулагчаар Монголын хүүхдийн урлан бүтээх төв ажиллаж байна. Үзэсгэлэнгийн хамтран зохион байгуулагчаар Монголын урчуудын эвлэл, СУИС-ийн Дүрслэх урлагийн академи, Нийслэлийн социал демократ Монголын эмэгтэйчүүдийн холбоо оролцож байна.
“Орд” үзэсгэлэн нь мэргэжлийн уран бүтээлчдийн ур чадвар, үнэт зүйл шингэсэн бүтээлүүдийг олон нийтэд хүргэх, Монгол үндэстний дахин давтагдашгүй онцлог, өвөрмөц сэтгэлгээ, соёлын илэрхийллийг харуулах, дүрслэх урлагийг нийтэд сурталчлан таниулах, соёлын боловсролыг нэмэгдүүлэх, биет болон биет бус соёлын өвийг түгээн дэлгэрүүлэх, мэргэжлийн уран бүтээлчдийг дэмжих, шинэ уран бүтээлчдийг таниулах, хүүхэд, залуучуудад урлагийн боловсрол олгох, сонирхлыг нь хөгжүүлэх зэрэг олон талын ач холбогдолтой юм.
