Улсын драмын эрдмийн театрын залуу жүжигчин Б.Баяржавхлантай уран бүтээлийнх нь талаар цөөн хором хөөрөлдлөө.
-Жавхаагийн уран бүтээл нь сайн уу?
-Сайн. Би 2012 онд Кино урлагийн дээд сургуулийг жүжигчин мэргэжлээр төгсөөд Улсын драмын эрдмийн театрт жүжигчнээр ажиллаж эхэлсэн. Үүнээс хойш туслах болох гол дүрүүдэд тоглосон. Анхны тоглосон уран бүтээл "Тэнгэрийн хүү" жүжгийн аравтын цэргийн дүр, “Гамлет" жүжигт Гильденстерний дүр, "Найрын ширээний ууц" жүжигт Галжавын "Ээжээ" жүжгийн Болдоогийн дүр гээд олон туслах дүрүүдэд ажилласан. Хамгийн сүүлд найруулагч Э.Ёндоншаравын "Буруугүй Буруутан" жүжигт МУГЖ Б.Жаргалсайхан ахын тоглосон Батдоогийн залуу үеийнх нь дүрд тоглож байгаа.
Дэлгэцийн уран бүтээлийн хувьд, "Зүүдэнд ч оромгүй явдал”, "Зэрлэг цэцэгсийн хүлэмж”, “Өнөөдөр” зэрэг кинонд тоглосон. Тайз, дэлгэцийн уран бүтээлээсээ гадна өөрийн бие даасан дууны уран бүтээлийнхээ ажлыг эхлүүллээ. Хамгийн эхний уран бүтээл бол "Чиний Сүүдэр" дуу. Энэхүү дууныхаа үг, аяыг өөрөө зохиосон. Хөгжмийн хэмнэлийг Ромо, төгөлдөр хуурыг Билгүүн тоглосон. Тун удахгүй та бүхэндээ уран бүтээлээ хүргэнэ.
-Уран бүтээлийн цаашдын төлөвлөгөө?
-Театрын уран бүтээлээ хийнэ. Мөн дэлгэцийн бүтээлүүдэд түлхүү тоглох бодол бий. Үүнээс гадна өөрийн бие даасан цомгоо гарахаар ажиллах төвлөгөөтэй байна.
-Дууныхаа үг, аяыг дандаа өөрөө зохиосон гэлээ. Ер нь өөрөө зохиох уу. Ямар жанраар уран бүтээлээ туурвих вэ?
-Би R&B, поп чиглэлийн уран бүтээлийг сонсогчиддоо хүргэх болно. Дууныхаа аялгууг би өөрөө зохионо. Харин хөгжмийг бол мэргэжлийн хүнээр бичүүлнэ. Дууны шүлгээ өөрөө зохионо мөн яруу найрагч, зохиолч нараас авч дуулна. Миний анхны уран бүтээл дээр хамтарч ажиллаж байгаа монгол залуус интертаймэнтийн "Bowtie" студи хийнэ. Тун удахгүй сонсогч, үзэгчиддээ шинэ клипээ хүргэх болно.
