Монголын соёл урлагийн салбарт хийж бүтээсэн олон гайхалтай үйл хэрэг, уран бүтээлүүдээрээ түмэн олны талархлыг хүлээсэн Ардын жүжигчин, Төрийн хошой соёрхолт, МУЗ-ын тэргүүн, хөгжмийн зохиолч Н.Жанцанноровын энэ хорвоод мэндэлсэн өдөр өчигдөр буюу 3 дугаар сарын 25-ны өдөр тохиосон билээ. Тэрбээр нийтдээ 300 орчим бүтээл туурвисаны дотор киноны 20 гаруй хөгжим, 10 гаруй драмын жүжгийн хөгжим бүтээж, "Монголын хөгжмийн 12 хөрөг" /Сонатын аллегро/, "Хөгжмийн онолын нэр томъёоны тайлбар толь" хөгжим судлалын ном, уран бүтээлийн 8 CD хэвлүүлсэн байдаг аж.
"Мандухай цэцэн хатан", "Мөнх тэнгэрийн хүчин дор", "Би чамд хайртай" киноны хөгжим, "Тогосын цагаа овоо", "Аргалд явсан ээж минь", "Бурхан бумбын орон", "Хүний заяа" зэрэг 100 гаруй дууны аяыг зохиожээ. Тэгвэл эрхэм уран бүтээлчийн маань энэ хорвоод мэндэлсэн өдрөөр нь түүний хүү болоод гэр бүл, найз нөхөд, шавь нараас нь нэгэн гайхалтай бэлгийг өгчээ. Тодруулбал эрхэм уран бүтээлчийн маань нэрээр нэрлэгдсэн www.jantsannorov.com албан ёсны вэб сайтыг "Жанцанноров" сангаас санаачлан "New Media Group" хийж гүйцэтгэн, түүний амьдрал уран бүтээлийн намтар, ярилцлага, илтгэл, нэвтрүүлгүүд, амжилт алдарын талаархи олон сайхан баримт материалуудыг оруулан бэлэг барьжээ.
Ийнхүү аавынхаа нэрийг өндөрт өргөж тун ч их амжилттай яваа авъяаслаг залуу "Монголын урлагийн залуучуудын холбоо"-ны Ерөнхийлөгчөөр нь ажиллаж байгаа бөгөөд түүнийхээ хажуугаар "Гэр" группыг байгуулан амжилттай ажиллаж яваа юм. Тэрбээр аавынхаа энэхүү баярт өдрийг тохиолдуулан өөрийн цахим хуудсанд бичихдээ:
Ѳнѳѳдѳр Аавын минь хорвоод мэндэлсэн ѳдѳр…
"Хүүхдүүд бид эцэг эхийнхээ ачийг хэрхэн, яаж хариулж чадах бол гэж үргэлж бодож явдаг ч хэзээ вэ гэдэг хариултыг нь тэр бүр олдоггүй байх. Харин миний хувьд ѳнѳѳдѳр Аавдаа нэгэн бэлэг барьж байгаа нь албан ёсны цахим хуудсыг нь нээж байгаа явдал юм. Үүнийг ачийг нь хариулж байна гэж ойлгож болохгүй байж болох ч Аавынхаа хийж, бүтээж, туурвиж буй уран бүтээл, үг, санамж бүрийг нь түгээх, олон нийтэд хүргэх нь миний үүрэг гэж бодож явдаг. Тандаа урт удаан насалж, эрүүл саруул байхын eрѳѳлийг дэвшүүльe. Энэхүү цахим хуудсыг бүтээхэд оролцсон бүх найзууд, гэр бүлийнхэндээ маш их баярлалаа" хэмээжээ.
Та бүхэн эрхэм хөгжмийн зохиолчийн баярын бэлэг болох түүний уран бүтээлийг түгээн дэлгэрүүлэх, сурталчлах, соёл судлалын нийтлэлүүдийг олны хүртээл болгох зорилготой албан ёсны суваг болох www.jantsannorov.com вэб хуудсаар зочлоорой.
www.urlag.mn
