“Маск” продакшны жүжигчин П.Эрдэнэзааныг фенүүд нь жаахан юм болохоор л марзаганаж, инээд алдаж явдаг мэтээр төсөөлдөг юм билээ. Том биетэй болохоор нь ч тэр үү, зарим хүмүүс түүнийг сав л хийвэл хэн нэгэнтэй ноцолдож явдаг байх гэлцэх нь ч бий. Гэвч тэдний энэ таамаг буруу байж.
Тайзан дээр олны инээдийг бардаг жүжигчин залуу чөлөөт цагаараа гэртээ амрах дуртай нэгэн гэсэн. Тэр тусмаа, хэвтэж амрахаас илүү эхнэр хүүхдээ гарынхаа хоолоор дайлах гээд гүйчихдэг гэж байгаа. Цаг наргүй их ажил, шоу тоглолтынхоо дараа амрах зав чөлөө гарвал янз бүрийн хоол хийх гээд гэртээ "шигдчихдэг" хэмээн найзууд нь түүний талаар хошигнодог аж.
Баяр ёслолоор хүртэл ирсэн зочдоо дайлах санаатай эхнэрээсээ урьтаж, ширээ засах гээд зүтгэчихдэг ажилсаг нь дэндүү халамжтай нөхөр юм байх. Хоол хийх хообийтой жүжигчин залуу маань элдэв амттан өрж, хоолны жор зохиох тунчиг дуртай гэдгээ хүртэл нуугаагүй. Богино хугацаанд хэрхэн амттай хоол, зууш бэлтгэх талаар "Маск" продакшны эмэгтэй жүжигчид түүнээс зөвлөгөө авах гэж хошуурдаг болсон нь ч үүнтэй холбоотой. Гэрийн ажилд эхнэрийнхээ гарыг хардаггүй хэмээн ойр дотныхноосоо "очков" авдаг халамжтай залуу маань гэнэ лээ. цаашид шинэ жорынхоо цуглуулгаар ном гаргаж ч магадгүй гэсэн шүү. Түүний зохиосон жоруудаас хамгийн хялбар нь сонгинотой хуурга гээд бод доо.
Б.Дэжид
