Монголын тайз, дэлгэцийн урлагт арилашгүй мөрөө үлдээж, өнөөг хүртэл хүчин зүтгэж яваа МУГЖ З.Жарантав гэх өвөрмөц нэртэй эрхэмийг өдгөө танихгүй, мэдэхгүй хүн ховор бизээ. 30 гаруй кинонд тоглож, театрын маш олон уран бүтээлд туслах болон гол дүрүүдийг амилуулж явсан энэ эрхэм өнөөдөр хөдөө орон нутгийнханд зориулсан соёл, урлагийн сургууль байгуулахаар хөдөлмөрлөж яваа. Залуу насаа театрын тайз, камерын өмнө өнгөрөөсөн түүнийг дэндүү хожуу гавъяат авсаныг мэдэх хүн цөөнгүй. Өөрөөс нь 10, 20 насаар дүү хүмүүс гавъяат болчихоод байхад З.Жарантав гуай Соёлын Тэргүүний Ажилтан ч үгүй явсан. Гэвч түүний театр болон кино урлагт оруулсан хувь нэмэр их тул 70 нас зооглож явахад нь МУГЖ гэх цолыг олгосон юм билээ.
Ингэж түүний авъяасыг хожуу үнэлэх болсон гол шалтгаан нь үндэс угсаагаар нь ялгаварлан гадуурхсаных. Учир нь түүнийг хятадын эрлийз гэдгийг олон хүн мэддэг, мань хүн ч өөрөө үүнийгээ нуулгүй хэлдэг. Ямарсайндаа л түүний хүүг Засгийн газарт ажиллуулахаар болж, бичиг баримтаа бүрдүүлээд ирэхэд нь “Өө чи чинь З.Жарантав гуайн хүү юм байна шүү дээ” гэж хэлээд ажилд авахаас татгалзаж байсан бөгөөд хүү нь аавдаа “Та хаа сайгүй зарлаж яваад одоо надад ажил ч олдохгүй юм байна” хэмээн гомдоллож байсан удаатай гэдэг.
Г.Мөрөн
