“KPop Demon Hunters” анимэйшны “Golden” дуугаараа олонд танигдсан дуучин Ejae “Le Sserafim”-тай хамтран “Made My Night” дууны шинэ хувилбарыг гаргасны дараа цахим орчинд маргаан дэгджээ.
“Le Sserafim” есдүгээр сарын 14-нд “Made My Night (feat. Ejae)” ремиксийг танилцуулсан бөгөөд Ejae зөвхөн дуулаад зогсохгүй уран бүтээлийн ажилд оролцсон байна. Тэрбээр өмнө нь “Le Sserafim”-ийн “So Cynical” дууны уран бүтээлд мөн оролцож байсан бөгөөд энэ нь тэдний хоёр дахь хамтрал болжээ.
Гэвч шинэ дуу гарсны дараахан сошиал орчинд Ejae 2024 онд “Berklee College of Music”-д лекц хийх үеэрээ “Le Sserafim”-ийн дуулах чадварыг шүүмжилсэн гэх мэдээлэл тархсан байна. Уг мэдээллийг “Weibo”-д өөрийгөө тус сургуулийн оюутан гэж танилцуулсан хэрэглэгчийн нийтлэлээс үүдэлтэй гэж “Koreaboo” мэдээлжээ.
Тухайн хэрэглэгчийн ярьснаар нэгэн оюутан Ejae-д өөрийн дууны демог сонсгож, уг бүтээлээ “Le Sserafim” эсвэл “Mamamoo”-ийн Хвасад өгөхөөр төлөвлөж байгаагаа хэлсэн байна. Харин Ejae уг дууг “Le Sserafim”-д өгөхгүй байхыг зөвлөж, тэднийг “муу дуучид” гэж хэлсэн гэх агуулгыг нийтэлжээ. Мөн дуу зохиогчийн хувьд уран бүтээлчийн дууны цар хүрээг харгалзах ёстой бөгөөд уг дуу Хвасад илүү тохирно гэж хэлсэн гэх мэдээлэл тархсан байна.
