Японы сумогийн дэвжээн дээр бяр чадал омголон зангаараа шуугиулж явсан их аварга Асашёорюү зодог тайлж эх орондоо ирээд удаж байгаа. Сумогийн 68 дахь ёкозуна Асашёорюү сумо бөхийг сонирхолтой хурц болгож, үзэгчдийг хуйлруулж дэлхий нийтийн сонирхлыг татсан их гавьяатай хүн.
Олон зуун жилийн түүхтэй сумо бөх, Япон улс ч Асашёорюүд өгөөжөө өгсөн. Хэрэв сумогоор барилдаагүй бол Асашёорюүг дэлхий нийт “нүдэлж” авч чадахгүй байсан байж ч магадгүй. Дэлхийд эдийн засгийн чадавхиараа тэргүүлдэг Япон улсад холливудын продюсерүүд киногоо сүр дуулиантай нээж, киноныхоо нээлтэнд оролцсон одод ч Асашёорюүтэй уулзах санал тавьдаг байсан гэдэг.
Монголчуудаас хамгийн олон холливудын одтой уулзан гар барьж, зураг хөргөө хамт татуулсан хүн бол Асашёорюү Дагвадорж л байх. Холливудын А зэрэглэлийн од, Оскарын шагналтай жүжигчин Шарльз Шерон, Камерон Диаз, нэрт дуучин Селин Дионтой тэврэлдэж зургаа авахуулсан, үг солин уулзаж ярилцсан ганц монгол эр бол Асашёорюү Дагвадорж гэхэд хилсдэхгүй.
Асашёорюү Дагвадорж тэдэнд, тэд Асашёорюүд ямар сэтгэгдэл үлдээснийг хэн ч таашгүй. Юутай ч Асашёорюү Камерон Диазтай авахуулсан зургийнхаа дор “Байдаг л бүсгүй” гэж тайлбарласан байх юм билээ. Дэлхийд алдартай жүжигчин, цэнхэр нүд, хөөрхөн инээд, урт хөлөөрөө гайхуулдаг, өөрөөсөө 8-9 дүү залуу дуучин Жастин Тимберликийг унаж тустал дурлуулж явсан манай гаригийн энэ гоо бүсгүйчүүдийн нэг Камерон Диаз их аварга Асашёорюүд ямар ч сэтгэгдэл үлдээгээгүй бололтой. Асашёорюүгийн энэ үгийг уншиж ойлгодогсон бол жүжигчин Камерон Диаз гомдох л байх даа.
Эх сурвалж: tovchoo.mn
